مەترسیی بۆشایی ئەمنی و سەرهەڵدانەوەی تیرۆر هەیەجێگری پێشووی سەرۆکی ئەنجومەنی نوێنەرانی عێراق هۆشداری دەدات لە کشانەوەی هێزەکانی هاوپەیمانان و ڕای دەگەیەنێت کە ئەم هەنگاوە دەبێتە هۆی دروستبوونی بۆشاییەکی ئەمنی کە پڕکردنەوەی قورس دەبێت، ئەمەش دەرگا بۆ گەڕانەوەی ڕێکخراوە تیرۆریستییەکان دەكاتەوە.
د. بەشیر حەداد، لە لێدوانێکدا بۆ «زاگرۆس» ڕای گەیاند: «چاوەڕوان دەکرێت لەگەڵ کشانەوەی هێزەکانی هاوپەیماناندا، شەپۆلێکی نوێی ئاوارەبوون ڕوو لە هەرێمی کوردستان بکاتەوە؛ ئەمەش مەترسیدارە و زەنگێکی مەترسیدارە بۆ چالاکبوونەوەی پاشماوەکانی داعش و گرووپە تیرۆریستییەکان.»
سەبارەت بە جوگرافیای مەترسییەکانیش، ناوبراو ئاماژەی بەوە دا کە ئەگەری سەرهەڵدانەوەی چەکدارانی تیرۆریست لەم جارەدا لە ناوچە سونەنشینەکانەوە زیاترە، و هۆشداری دا لەوەی کە دووبارە ڕوودانی ئەم دۆخە دەبێتە هۆی دروستبوونی لافاوێکی نوێی ئاوارە بەرەو هەرێمی کوردستان.