سەرۆكی هاووپەیمانیی مەسیحی، رایدەگەیەنێت، ئەوان حەوت هەزار قوتابیان لە هەولێر و دهۆك هەیە كە زمانی سریانی دەخوێنن، هەروەها 200 گوندیان لە دهۆك هەیە، كەچی هیچ یەك لەوانە لە سلێمانی نییە، كەچی كورسیی بۆ كریستیانەكان دانراوە.
ئانۆ جەوهەر، سەرۆكی هاوپەیمانیی مەسیحی، لە چاوپێكەوتنێكی تەلەفزیۆنیدا، ئاماژەی بەوە كردووە، لە دهۆك نزیكەی 200 گوندیان هەیە، هەروەها لە سلێمانی، یەك گوندیان نییە.
روونی دەكاتەوە، لە هەولێر و دهۆك، 52 قوتابخانەی سریانی هەن، حەوت هەزار قوتابی زمانی سریانی دەخوێنن، و 650 مامۆستا سریانی هەن، بەڵام لە سلێمانی هیچ یەك لەوانە نییە.
هاوكات رایگەیاندووە، 12 هێزی سیاسی كریستیان هەن كە بارەگاكانیان لە هەولێرە و لە سلێمانی نییە، دەڵێت: “ئەمە خەتای پارتی و یەكێتی نییە، بەڵكو دیمۆگرافیای ئێمەیە كە پێش ئەو دوو حزبە لێرە هەین كە مێژووەكەی دەگەرێتەوە بۆ حەوت هەزار ساڵ پێش ئێستا.
دووپاتی دەكاتەوە كە ئەمە زوڵمە لە كریستیانەكان دەكرێت.
رۆژی 21ی ئایار، دەستەی دادوەریی كۆمسیۆنی باڵای سەربەخۆی هەڵبژاردنەكانی عێراق، بڕیاری دا، پێنج كورسی بۆ پێكهاتەكان لە كۆی 100 كورسییەكەی پەرلەمانی كوردستان تەرخان كرد.
بە گوێرەی بڕیارەكە، دوو كورسی بۆ هەولێر(توركمان، كریستیان)، دوو كورسی بۆ سلێمانی(توركمان، كریستیان) و دهۆك كورسییەك (ئەرمەن) دانراوە.
پێكهاتەكانیش ئەمەش بە ناحەقی دەزانن و پێیانوایە، لێدانە لە بەرژەوەندییەكانی ئەوان.