ئەمڕۆ سێشەممە بە سەرۆكایەتی محەمەد شیاع سوودانی سەرۆك وەزیرانی عێراق كۆبوونەوەی ئاسایی هەفتانەی ئەنجوومەنی وەزیرانی عێراق بەڕێوەچوو.
ئەنجوومەنی وەزیرانی عێراق لە كۆبوونەوەكەدا پێشنیازی هەمواركردنەوەی ماددەی 2 لە یاسای بودجەی سێ ساڵە ژمارە (13ی ساڵی 2023) تایبەت بە نەوتی هەرێمی كوردستان پەسەند كرد.
بەگوێرەی هەمواركردنەوەی ماددەكە، نەوتی بەرهەمهێنراو لە هەرێمی كوردستان رادەستی كۆمپانیای بەبازاڕكردنی نیشتمانی (سۆمۆ) و وەزارەتی نەوتی فیدڕالی دەكرێت، بۆ ئەم مەبەستەش ماوەی 60 رۆژ دیاری كرا بۆ ئەوەی وەزارەتی سامانە سروشتییەكانی هەرێمی كوردستان و وەزارەتی نەوتی عێراق بگەنە رێككەوتنی كۆتایی لەبارەی دەستپێكردنەوەی پڕۆسەی هەناردەكردنی نەوتی هەرێمی كوردستان.
هەروەها بڕیاردرا لەلایەن لایەنێكی راوێژكاریی نێودەوڵەتییەوە بڕی تێچووی بەرهەمهێنان و گواستنەوەی نەوتی هەرێمی كوردستان بۆ وەزارەتی نەوت و دارایی عێراق دیاری بكرێت.
ئاماژە بەوەشدرا كە تا لایەنە راوێژكارییە نێودەوڵەتییەوە بڕی تێچووی بەرهەمهێنان و گواستنەوەی نەوتی هەرێمی كوردستان دەخەملێنێت، بڕی 16 دۆلار بۆ بەرهەمهێنانی هەر بەرمیلێك نەوت بدرێت بە حكوومەتی هەرێمی كوردستان.