ئەمڕۆ یەکشەممە 1/19، مەسرور بارزانی، سەرۆکی حکومەتی هەرێمی کوردستان، بەسەردانێکی فەرمی گەیشتە عەممانی پایتەختی شانشینی ئوردن و لەگەڵ گەیشتنی لەلایەن شا عەبدوڵلای دووەم، شای شانشینی ئوردنەوە، پێشوازی لێکرا.
لە کۆبوونەووکەدا، گفتوگۆ لەبارەی پەرەپێدانی هاریکاری و هاوئاهەنگیی نێوان ئوردن و هەرێمی کوردستان و دەرفەتەکانی فراوانکردنی لە بوارە جیاوازەکاندا کرا. شا عەبدوڵڵای دووەم، سڵاو و ڕێز و پێزانینی خۆی بۆ سەرۆک مەسعوود بارزانی دەربڕی. هەردوولا جەختیان لە گرنگیی پتەوکردنی پەیوەندیی دۆستانەی ئوردن لەگەڵ هەرێمی کوردستان و عێراق لە هەموو بوارەکاندا کرد.
سەرۆکی حکومەت هەوڵەکانی شانشینی هاشمیی ئوردنی بە ڕێبەرایەتيی شا عەبدوڵڵای دووەم، بۆ بەدیهێنانی ئاشتی و سەقامگیری لە ڕۆژهەڵاتی ناوەڕاست، بەرز نرخاند.
سەبارەت بە بارودۆخی سووریاش، دووپات کرایەوە کە ئاسایش و سەقامگیريی سووریا، بۆ سەقامگیریی ناوچەکە زۆر گرنگە، هەروەها هەردوولا جەختیان لە گرنگیی بەردەوامبوونی ڕێککەوتنی ئاگربەست لە کەرتی غەززە و گەیشتن بە ئاشتییەکی گشتگیر لە سەرتاسەری ناوچەکەدا کردەوە.