جێگری سەرۆکی پەرلەمانی عێراق ئاشكرای دەكات، بۆ دواخستن و ناردنی مووچەی هەرێمی كوردستان، دارایی عێراق بیانوو دروست دەكات، دەشڵێت: “پێرێ لای سوودانی بووم، گوتی مووچەی مانگی دوو دەنێرم.”
ئەمڕۆ سێشەممە 11/3/2025، د. شاخەوان عەبدوڵا، جێگری سەرۆکی پەرلەمانی عێراق لە پرێس كۆنفرانسێكدا ڕایگەیاند: ” وەزارەتی دارایی عێراق بۆ دواخستنی ناردنی مووچە بیانوو دەهێنێتەوە، یانیش لە كۆتایی مانگ داواكاری و بیانوو دەهێنێتەوە، ئەگەر راستە بۆ لە سەرەتای مانگەوە داواكارییەكان بە هەرێمی كوردستان نادات؟ بۆ دەیخاتە كۆتایی مانگ؟”
ئاماژەی بەوەش دا: “ئەوەی تەیف سامی دەیكات كە تەنیا ئەو نییە، بەڵكوو سیاسەتێكە دژی مووچەخۆرانی هەرێمی كوردسنان، بەڵام بەدڵنیاییەوە بەم شێوەیە بەردەوام نابێت، چونكە نە پەرلەمانتارانی كورد نە سیاسییەكانی كورد ئەمە قبووڵ ناكەن.”
جێگری سەرۆکی پەرلەمانی عێراق دەشڵێت: “پێرێ لای سوودانی بووم، گوتی مووچەی مانگی دوو دەنێرم، بەڵام دەبێت سەرۆك وەزیرانی عێراقیش لەسەر ئەو پرسە زیاتر لەگەڵ ئێمە روون بێت و ناكرێت تەیف سامی هەموو جارێك بڵێت كە دەبێت سوودانی داوام لێ بكات مووچەی هەرێمی كوردستان خەرج بكەم، دەبێت ئەوە روون بكرێتەوە كێ لە پشت ئازاردان و سزادانی فەرمانبەرانی ئێمەیە و ئیتر چیی دیكە مایەی قبووڵكردن نییە.”