رۆژی سێشەممە 15ـی نیسانی 2025 هەردوو شاندی پارتی دیموکراتی کوردستان و یەکێتی نیشتمانی کوردستان لە بارەگای مەکتەبی سیاسی پارتی لە پیرمام کۆبوونەوە و دوای تەواوبوونی کۆبوونەوەکە راگەیەنراوێکی هاوبەشیان بڵاوکردەوە.
لە راگەیەنراوە هاوبەشەکەدا هاتووە؛ “ئەمڕۆ لە بارەگاى مەکتەبى سیاسیى پارتى دیموکراتى کوردستان لە پیرمام، هەردوو شاندى دانوستانکارى یەکێتىى نیشتمانیى کوردستان و پارتى دیموکراتى کوردستان کۆبوونەوە”.
لەبارەی ناوەڕۆکی کۆبوونەوەکە ئاماژە بەوە دراوە؛ “لە کۆبوونەوەکەدا، کە لە کەشێکى دۆستانە و ئەرێنیدا بەرێوەچوو، گفتوگۆ لەبارەى هەنگاوەکانى پێکهێنانى کابینەى نوێى حکوومەت کرا و، هەنگاوى ئیجابى و بەرەوپێشچوونى باش هەبوو”.
لە کۆتایی راگەیەنراوەکەدا باس لە بەردەوامبوونی کۆبوونەوەکان کراوە و دەڵێت؛ “لە ڕۆژانى داهاتوودا کۆبوونەوەکان بەردەوام دەبن”.
