مامۆستایەكی زانكۆێ دبێژیت ئەوا ئەڤرۆ ل پەرلەمانێ عیراقێ د دەما هەلبژارتنا جێگرێ ئێکێ و گەرا ئێکێ یا هەلبژارتنا جێگرێ دووێ دا روویدای، بۆ پارتی نە دۆراندنا پۆستەکی بوو، بەلکو سەرکەفتنەکا مەزن بوو د ئاشکەراکرنا روویێ مەترسیدار یێ عیراقێ ل بەر دەمێ جڤاکا نێڤدەولەتی.
محەمەد عامر دێرەشەوی مامۆستایێ زانكۆیێ بۆ ئاژانسا هەوالا زاگرۆس راگەیاند روودانێن ئەڤرۆ سەلماند کو پتری ١٠٠ پەرلەمانتارێن ژ پاشخانا عەصائیب و فەصائیلێن دیتر و دویڤەلانکێن وان، دخوازن ب هەمی رەنگان بریار و سیاسەتا گشتی یا عیراقێ ب ئاراستەیەکێ مەترسیدار ببەن. ئەوێن دوهی ب درۆن و چەکان هێرش دکرە سەر کوردستانێ، ئەڤ شەڤە هەولدان ل بن چەترا پەرلەمانی شکەستێ بدەنە دیموکراسیێ، فیدرالیەتێ و قەوارێ هەرێما کوردستانێ.
محەمەد عامر گووت سیستەمێ سیاسیێ جیهانی چ جاران قەبوول ناکەت عیراق ببیتە دەولەتەکا سەرکێش و ژ یاسایێن نێڤدەولەتی دەرکەڤیت، و بێگۆمان ئەوێن ئەڤرۆ ئەڤ یارییە کری دێ باجا وێ دەن. مخابن بۆ وان پەرلەمانتارێن ب دەنگێ گەلێ کورد گەهشتینە پەرلەمانی، لێ ئەڤرۆ بوونە پارچەک ژ ئەجندایێن دژبەرێن هەرێمێ و پاشکۆیێن فەصائیلان.
ئەو مامۆستایێ زانكۆیێ راگەیاند پارتی دێ هەر مینیت دیوارێ پۆلایین یێ پاراستنا دیموکراسیێ و قەوارێ هەرێما کوردستانێ. پۆست ل دەف نە د گرنگن، یا ژ هەمیێ گرنگتر پاراستنا کەرامەتا مللەتێ کورد و دەستکەفتێن وی یێن نەتەوەیی یە.