بە بۆنەی سەری ساڵی (٢٠٢٦)ی زایینی، پیرۆزبایی لە هاونیشتمانیانی هێژا و خۆڕاگر و گەلە خۆشەویستەکەمان لە ناوەوە و دەرەوەی هەرێمی کوردستان و عێڕاق دەکەین، پیرۆزباییەکی گەرم لە بنەماڵە و کەسوکاری سەربەرزی شەهیدان و هێزی پێشمەرگەی کوردستان و هێزەکانی ئاسایش و ناوخۆ و دامودەزگاکان و سەرجەم کادیر و ئەندام و لایەنگرانی دڵسۆز و خۆڕاگری پارتیمان دەکەین، هیوای ساڵێکی ئاسوودە و ئارام و پڕ دەستکەوتیان بۆ دەخوازین.
هاوکات پیرۆزبایی گەرم و برایانەمان ئاراستەی سەرجەم پێکهاتەکان و هێز و لایەنە سیاسییەکانی کوردستان و عێراق دەکەین و، جەخت لە پێویستی هەماهەنگی و کاری پێکەوەیی نێوانمان دەکەینەوە بەتایبەت لەم قۆناغە هەستیارەدا کە پێویستە هەموو لایەک بەوپەڕی بەرپرسیارەتییەوە کاربکەین بۆ پاراستن و بەهێزکردنی قەوارەی هەرێمی کوردستان و پاراستنی سەروەری عێراق و دەستەبەرکردنی ڕەوشێکی سەقامگیر و ئارام بۆ هاووڵاتیان، هەروەها چارەسەرکردنی کێشە و گرفتە هەڵپەسێردراوەکان و زامنکردنی مافەکانی هاونیشتمانیان و شایستە داراییەکان لە چوارچێوەی یاسایی و دەستوور.
ئومێدەوارین ساڵی (٢٠٢٦) ساڵێکی موژدەبەخش بێت، ساڵی کۆتایی هاتنی قەیران و گیروگرفتەکان و، ساڵی بەختەوەری و بەهێزکردنی ئاشتەوایی و لێبووردەیی نێوان گشت پێکهاتەکان بێت..
مەکتەبی سیاسیی پارتی دیموکراتی کوردستان
٣١ی کانوونی یەکەمی ٢٠٢٥