لەسەر فەرمانی ڕێبەر ئەحمەد، وەزیری ناوخۆ و بەمەبەستی ڕێگریکردن لە کارەساتی نەخوازراو، ئاگەداری شۆفێرانی بارهەڵگر و بیناسازی دەکەینەوە لە ڕێکەوتی ٢٠٢٦/٤/٢٨ بەدواوە ئۆتۆمبێلی بارهەڵگر و بیناسازی لە چوار تەن زیاتر قەدەغەیە بە ژمارەی کاتی، کاری گواستنەوەی (بار) بکات تا ئەو کاتەی ژمارە کاتییەکەی تۆمار دەکرێت و ژمارە و تابلۆی تایبەت بە خۆی وەردەگرێت.
ئەو بارهەڵگرانەش کە تۆمارکراون دەبێ بە دروستی و لە کاتی خۆی پشکنینی ساڵانە بۆ دڵنیابوون لە مەرجەکانی سەلامەتی ئەنجام بدەن، بەپێچەوانەوە دەست بەسەر بارهەڵگرەکەدا دەگیرێ و سزای داراییی قورس بەسەریاندا دەسەپێندرێت.
بەڕێوەبەرایەتییەکانی هاتوچۆ لە پارێزگە و ئیدارە سەربەخۆکان و مەفرەزەکانیان ڕادەسپێرین کاری پێویست ئەنجام بدەن.
ڕاگەیاندنی بەڕێوەبەرایەتیی گشتیی هاتوچۆی هەرێمی کوردستان
٢٧ی نیسانی ٢٠٢٦