لە یاری کۆتایی یۆرۆپالیگ هەردوو یانەی ئاتلانتا و بایەر لیڤەرکوزن ڕووبەڕووی یەکتر بوونەوە.
لە ئەنجامدا یانەی ئاتلانتا کۆتایی بە چیرۆکی ئەلۆنسۆ هێنا و توانی بە سێ گۆڵی بێبەرامبەر شکست بە لیڤەرکوزن بهێنێت.
لە تایمی یەکەم یانە ئیتاڵیەکە باشتر دەرکەوت و هەرزوو گۆرزی خۆی وەشاند و لە خولەکی 12 لەڕێی یاریزان لۆکمانەوە گۆڵی یەکەمیان تۆمارکرد،
دوای ئەوە هێرشەکانی ئاتلانتا بەردەوامبوون و هەمان یاریزان لە خولەکی 26دا گۆڵی دووەمی خۆی و یانەکەی تۆمارکرد و ئەو تایمەش بەو شێوەیە مایەوە.
لە تایمی دووەمدا یانە ئیتاڵیەکە بە هێزی گەڕایەوە کۆنترۆڵی یارییەکەیان کرد و لیڤەرکوزنی خستە بەر فشارەکانیان، تا لە خولەکی 76 لۆکمان توانی سێیەم گۆڵی خۆی و یانەکەی تۆماربکات،
بەم سەرکەوتنەش یانەی ئاتلانتا بووە پاڵەوانی یۆرۆپالیگ بۆ یەکەمجار، لیڤەرکوزنیش دوای 52 یاری تووشی یەکەم شکست هات.