بابەتی ڕۆیشتنی لیۆنێل مێسی ئەفسانەی تۆپی پێ لە یانەی ئینتەر میامی لەم هاوینەدا یەکێکە لەو بابەتانەی چاوی زۆری ڕاکێشاوە و لەکاتی هەر قسەیەکی تازە لەسەر بابەتەکە خێرا بڵاوکراوەکان تیشکی زیاتر دەخەنە سەری و بە گەرمی باسی لێوەدەکەن.
نوێترین قسەش لەم بابەتی ڕۆیشتنەی مێسی قسەیەکی سیسک فابریگاسی ڕاهێنەری یانەی کۆمۆی ئیتاڵیە،کە لە وەڵامێکی بۆ ڕۆژنامەنووسان لە کۆنگرەیەکی ڕۆژنامەوانی لە ڕۆژی سێشەمە دەربارەی هاتنی مێسی بۆ کۆمۆ وتبووی”هەرگیز ناتوانی بڵێی هەرگیز نابێت”،کە هەر ڕێک دوای ئەو قسەیە لێکدانەوەکان وای بۆ چوون مێسی دەچێتە کۆمۆی ئیتاڵی.
پێشتر ئەوە ئاشکرا کرابوو،کە مێسی لەم هاوینەدا چۆتە ماڵی فابریگاس لە ئیتاڵیا بەڵام تاکو ئێستا هیچ هەواڵێکی فەرمی نییە دەربارەی ئاڕاستە کردنی بۆندێک لەلایەن کارگێڕی یانەی کۆمۆ بۆ گرێبەست کردن لەگەڵ ئەفسانەکەی تانگۆ.
“سەرکار ڕێبوار”