کارگێڕی ڕیاڵ مەدرید بڕیاری داوە ئەستێرە لاوەکەیان، فرانکۆ ماستانتۆنۆ، بە شێوازی خواستن بۆ یانەیەکی تر بنێرێت تاوەکو بەشداریی زیاتری پێبکرێت و ئاستی پێشبکەوێت، مەگەر ڕاهێنەری نوێی یانەکە بڕیارێکی تر بدات.
بەپێی ڕۆژنامەی ئاس، مێرێنگی دەیەوێت بەم هەنگاوە ڕێگری لە سستبوونی گەشەسەندنی یاریزانەکە لەسەر کورسی یەدەگ بکات. بژاردەی یەکەمی ڕیاڵ مەدرید ئەوەیە یاریزانەکە لە ناو خولی ئیسپانیا یاری بکات بۆ ئەوەی بە ئاسانی چاودێری ئاست و پێشکەوتنەکانی بکەن، هەرچەندە ئەگەری ڕووکردنە یانەیەکی دەرەوەی ئیسپانیاش هێشتا کراوەیە.
ڕیاڵ مەدرید بە تەواوی ئیش لەسەر پاراستنی بەهرەی لاوەکانی دەکات و نایەوێت بە کورسی یەدەگ تواناکانیان بەفیڕۆ بچێت.
هەروەها هەڵبژاردنی خولی ئیسپانی وەک بژاردەی یەکەم، دەری دەخات کە یانەکە دەیەوێت بە چاوی خۆی چاودێری گەشەکردنی یاریزانەکە بکات لە کۆتاییدا، دیاریکردنی چارەنووسی کۆتایی ئەم یاریزانە ڕاستەوخۆ بەستراوەتەوە بە ڕای ڕاهێنەری نوێی یانەکەوە.