لە ساڵی 2025ـدا، ژمارەی ئۆتۆمبێلە کارەباییەکان لە جیهاندا خێراترین گەشەی مێژوویی خۆی تۆمار کرد. بەپێی داتاکانی سەنتەری “ZSW” لە ئەڵمانیا، ژمارەی ئۆتۆمبێلە کارەباییەکان گەیشتە پتر لە 74 ملیۆن.
تەنیا لە ساڵی ڕابردوودا 19 ملیۆن ئۆتۆمبێلی نوێ زیاد بوون، کە ئەمەش بەرزترین ڕێژەی گەشەیەکی خێرایە.
چین بە 44 ملیۆن ئۆتۆمبێل لە پلەی یەکەمدایە، ئەمەش واتە لە هەر 10 ئۆتۆمبێلی کارەبایی 6ـیان بەرهەمی ئەو وڵاتەن. ئەمریکا بە 7 ملیۆن و ئەڵمانیا بە 3.2 ملیۆن ئۆتۆمبێل لە پلەکانی دووەم و سێیەمدان.
ئەندریاس بۆتنەر لە سەنتەری “ZSW” ئاماژەی بەوە کرد، ئەو وڵاتانەی ئۆتۆمبێلی کارەباییان زۆرە، باشتر ڕووبەڕووی قەیرانی سووتەمەنی دەبنەوە.
ئاماژەی بەوەش کرد، خاوەن ئۆتۆمبێلە کارەباییەکان پشت بە سووتەمەنی نایاب نابەستن و بەردەوام لە بەرزبوونەوەی توندی نرخەکان پارێزراون.
لە ئاستی کۆمپانیاکاندا، “BYD”ـی چینی بە 15 ملیۆن ئۆتۆمبێل پێشەنگی گرتووە. تێسلا بە 9 ملیۆن لە پلەی دووەم و فۆڵکسواگن بە 5.7 ملیۆن لە پلەی سێیەمدایە.
هەروەها کۆمپانیاکانی “BMW” و مێرسیدس لە لیستی 10 باشترینەکاندا جێگەی خۆیان کردووەتەوە.
ئەم گەشە گەورەیە نیشانەی گۆڕانی بەردەوامی جیهانە بەرەو وزەی پاک و کەمکردنەوەی بارگرانییە ئابوورییەکان لە کاتی قەیرانەکاندا.