کۆمپانیای ئۆپن ئەی ئای لە نوێترین هەنگاویدا بۆ پەرەپێدانی تەکنەلۆژیا، مۆدێلێکی نوێی ژیری دەستکردی بە ناوی GPT-4o ئاشکرا کرد کە گۆڕانکارییەکی گەورە لە شێوازی کارلێکی نێوان مرۆڤ و کۆمپیوتەر دروست دەکات. ئەم مۆدێلە نوێیە توانای هەیە بە شێوەیەکی ڕاستەوخۆ و هاوکات لەگەڵ دەق و دەنگ و وێنەدا مامەڵە بکات و وەڵامی داواکارییەکانی بەکارهێنەران بداتەوە بە خێراییەکی زۆر کە هاوتایە لەگەڵ خێرایی گفتوگۆی مرۆڤ.
لە کاتی نمایشکردنی تواناکانی ئەم سیستەمەدا دەرکەوت کە GPT-4o دەتوانێت لە ڕێگەی کامێرای مۆبایلەوە سەیری دەوروبەری بکات و شیکاری بۆ ئەو شتانە بکات کە دەیانبینێت، وەک چارەسەرکردنی هاوکێشە بیرکارییەکان کە لەسەر کاغەز نووسراون یان ناسینەوەی هەستی مرۆڤەکان لە ڕێگەی شیکردنەوەی ڕوخساریانەوە. هەروەها سیستەمەکە دەتوانێت بە دەنگێکی سروشتی گفتوگۆ بکات و لە کاتی قسەکردندا گۆڕانکاری لە تۆنی دەنگیدا بکات یان تەنانەت گاڵتە و پێکەنینیش بکات کە ئەمەش وای کردووە زۆر لە مرۆڤ بچێت.
میرا مۆراتی، بەڕێوەبەری تەکنەلۆژیای کۆمپانیای ئۆپن ئەی ئای، ڕایگەیاند کە ئامانجیان لەم وەشەنە نوێیە ئەوەیە کە بەکارهێنانی ژیری دەستکرد بۆ هەمووان ئاسانتر و سروشتیتر بکەن، بۆیە بڕیاریان داوە ئەم تایبەتمەندییە پێشکەوتووانە بە شێوەیەکی خۆڕایی بۆ بەکارهێنەرانیش بەردەست بکەن. ئەم پێشکەوتنە نوێیە کێبڕکێیەکی توندتر لە بازاڕی تەکنەلۆژیای جیهانیدا دروست دەکات و ئاسۆیەکی نوێ بۆ بەکارهێنانی یاریدەدەرە زیرەکەکان لە ژیانی ڕۆژانەدا دەکاتەوە.