ئەکتەری بەریتانی، تۆم فێڵتن، لەلایەن ئامادەبووانی شانۆی بڕۆدوەیەوە بە شێوەیەکی زۆر گەرم پێشوازیی لێکرا، کاتێک جارێکی دیکە ڕۆڵی کارەکتەری ناسراوی “دراکۆ ماڵفۆی”ی لە زنجیرە فیلمی هاری پۆتەردا گێڕایەوە، ئەمجارەیان لە چوارچێوەی شانۆگەریی “Harry Potter and the Cursed Child”.
هەر کە فێڵتن بۆ گێڕانی یەکەم دیمەنەکانی لەسەر شانۆ دەرکەوت، ئامادەبووان بۆ ماوەی زیاتر لە ٣٠ چرکە بە بەردەوامی چەپڵەیان بۆ لێدا. ئەم دیمەنە کاریگەرە خۆشەویستیی بینەرانی بۆ ئەو ئەکتەرە دەرخست. فێڵتن نەیتوانی دیالۆگەکەی بڵێت تاوەکو چەپڵەکان هێور بوونەوە و بە زەردەخەنەیەکی پڕ لە هەستەوە سەیری ئامادەبووانی کرد.
تۆم فێڵتن گرتە ڤیدیۆییەکەی لە هەژماری فەرمیی شانۆگەرییەکە لە ئینستاگرام بڵاوکردەوە. هەواداران دڵخۆشیی خۆیان بە گەڕانەوەی فێڵتن بۆ ڕۆڵە کۆنەکەی دەربڕی. یەکێکیان نووسیبووی: “ئەو بە تەواوی شایەنی ئەم جۆرە خۆشەویستییەیە.” یەکێکی دیکە گوتی: “یەکسەر دەستم کرد بە گریان کاتێک کاردانەوەی ئەوم بۆ هتافی بینەران بینی”.
لەم شانۆگەرییەدا تۆم فێڵتن ڕۆڵی دراکۆ ماڵفۆی پێگەیشتوو دەگێڕێت و چیرۆکەکە ١٩ ساڵ دوای کۆتایی زنجیرە فیلمەکە ڕوودەدات و باس لە ژیانی منداڵەکانی دراکۆ، هاری، ڕۆن و ھێرمایۆنی لە قوتابخانەی ھۆگوارتس دەکات.