ئەمڕۆ شەممە، 20ی حوزەیرانی 2026، لەگەڵ داخستنی مامەڵەکانی هەفتە لە بازاڕەکانی وزەدا، نرخەکانی نەوت پاشەکشە بەردەوامەکانی چەند ڕۆژی ڕابردوویان ڕاگرت و جۆرێک لە چاکبوونەوە و بەرزبوونەوەیان بەخۆوە بینی.
هۆکاری ئەم گۆڕانکارییە نوێیە بۆ ئەوە دەگەڕێتەوە کە دانوستاندنەکانی نێوان ئێران و ئەمریکا، کە بڕیاربوو لە سویسرا بەڕێوەبچن، هەڵوەشایەوە. هاوکات کۆشکی سپیش ڕایگەیاند، جەی دی ڤانس، جێگری سەرۆکی ئەمریکا گەشتەکەی بۆ سویسرا هەڵوەشاندووەتەوە، ئەمەش سەرلەنوێ سەرنجی بازرگانانی بەرەو دۆخی داهاتووی ناوچەکە ڕاکێشا.
لە کاتی داخستنی بازاڕدا، نرخی هەر بەرمیلێک نەوتی خاوی برێنت گۆڕانکاریی بەسەردا هات و گەیشتە 80.57 دۆلار، کە بەراورد بە ئامارەکانی پێشوو (77.79 دۆلار) بە بڕی 2.78 دۆلار بەرزبووەتەوە.
هاوكات، نرخی هەر بەرمیلێک نەوتی خاوی سووکی تەکساسی ئەمریکیش ڕووی لە هەڵکشان کرد و گەیشتە 76.54 دۆلار, کە ئەمەش بەراورد بە دواین ئاماری تۆمارکراو (74.91 دۆلار) بەرزبوونەوەیەکی 1.63 دۆلاری نیشان دەدات.
ئەم جووڵە نوێیەی نرخەکان دوای ئەوە دێت کە بازاڕەکان هێمنییەکیان بەخۆوە بینیبوو پاش ئەو دابەزینە بەرچاوەی کە بەهۆی واژۆکردنی ڕێککەوتنەکەی نێوان واشنتن و تاران بۆ کۆتاییهێنان بە گرژییەکان دروستببوو، بەڵام هەڵوەشاندنەوەی گەشتەکەی جێگری سەرۆکی ئەمریکا و دانوستاندنەکان، دووبارە بووەوە هۆی دروستبوونی ئەم بەرزبوونەوە کاتییە لە نرخەکاندا پێش دەستپێکردنەوەی مامەڵەکانی هەفتەی داهاتوو.