لە کاتێکدا پێکدادانی سەربازی نێوان ئەمریکا و ئێران بەردەوامە، واشنگتن دووپاتی کردەوە کە هێشتا پابەندە بە ڕێگای دیپلۆماسی و ڕایگەیاند کە گفتوگۆکان لەگەڵ تاران، سەرەڕای هەڵگیرسانی دۆخەکە لە تەنگەی هورمز و هێرشە سەربازییە بەرامبەرەکان، بەردەوام دەبن.
ڕۆژنامەی وۆڵ ستریت جۆرنال لە سەر زاری بەرپرسیارێکی ئەمریکی نووسی کە ویلایەتە یەکگرتووەکان گفتوگۆکان لەگەڵ ئێران دەبەنە پێشەوە، و ئەو هەڵگیرسانەی سەربازی بە جێگرەوەی چارەسەری سیاسی نازانن، بەڵکو وەک ئامرازێک بۆ زیادکردنی فشار بۆ گەیشتن بە ڕێککەوتنێکی کۆتایی.
ئەم ڕاگەیاندنە دوای ئەوە هات کە فەرماندەیی ناوەندی سوپای ئەمریکا ڕایگەیاند کۆتایی بە قۆناغێکی نوێی هێرشە سەربازییەکانی لە دژی ئێران هێناوە، و گوتی زیاتر لە ٨٠ ئامانجی سەربازی، لەوانە سیستەمی بەرگریی ئاسمانی، تۆڕەکانی فەرماندەیی و کۆنترۆڵ، ڕادارە کەنارییەکان، سەکۆکانی فیشەکی دژە کەشتی و زیاتر لە ٦٠ بەلەمی خێرای سەر بە سپای پاسداران لە دەوروبەری تەنگەی هورمز ئامانج گیراون.
فەرماندەیی ناوەندی ئەمریکا ئاماژەی بەوە دا کە ئامانجی هێرشەکان کەمکردنەوەی توانای ئێران بووە بۆ هەڕەشەکردن لە دژی هاتووچۆی دەریایی نێودەوڵەتی، و هەروەها دووپاتی کردەوە کە هێزەکانی ئەمریکا «هەمیشە ئامادەی جوڵانەوەن» ئەگەر ئێران پابەند نەبێت بە ڕێککەوتنەکان.
لە بەرامبەردا، فەرماندەیی سەربازی ئێران بە وەڵامێکی «کوشندە و توند» هەڕەشەی کرد و هێرشەکانی ئەمریکای بە «دەستدرێژییەکی ئاشکرا» ناو برد، هەروەها ڕەتیکردەوە هەر ڕۆڵێکی ئەمریکا لە بەڕێوەبردنی هاتووچۆی دەریایی لە تەنگەی هورمز.
ئەم هەڵوێستەی نوێی واشنگتن دوای ئەوە هات کە وەزارەتی گەنجینەی ئەمریکا مۆڵەتی کاتی هەناردەکردنی نەوتی ئێرانی هەڵوەشاندەوە؛ مۆڵەتێک کە تا مانگی ئاب بەردەوام بوو. بەڕێوەبەرایەتی ئەمریکا ئەم بڕیارەی پەیوەست کرد بەو هێرشانەی کە سێ کەشتی بازرگانی لە تەنگەی هورمز بوونە ئامانج، لەوانەش کەشتییەکی گواستنەوەی گازی سروشتیی شلەی قەتەر.