ئەمڕۆ یەکشەممە 12-7-2026 ئەنجومەنی گەلی
سووریا (پەرلەمان) یەکەم دانیشتنی فەرمی خۆی بە ئامادەبوونی ئەحمەد شەرع، سەرۆککۆماری وڵاتەکە دەستپێکرد.
بەپێی ڕاپۆرتی ئاژانسی هەواڵی “سانا”، دانیشتنەکە لەلایەن محەمەد تەها ئەحمەد، سەرۆکی لیژنەی باڵای هەڵبژاردنەکانەوە کرایەوە و تێیدا ئەندامانی نوێی پەرلەمان لەبەردەم سەرۆککۆماردا سوێندی یاساییان خوارد.
ئەم کۆبوونەوەیە وەک وێستگەیەکی مێژوویی و وەرچەرخانێکی گەورە لە مێژووی هاوچەرخی سووریادا دادەنرێت، چونکە یەکەمین دانیشتنی پەرلەمانە دوای ڕووخانی ڕژێمی پێشوو، کە لەسەر بنەمای ڕێوشوێنە یاسایی و دەستوورییەکانی بەیاننامەی ساڵی 2025 بەڕێوەدەچێت.
ئەحمەد شەرع لە گوتارێکدا جەختی لە گرنگی تەبایی، ڕێککەوتن و قبوڵکردنی یەکتر کردەوە وەک بنەمایەکی سەرەکی بۆ نەهێشتنی ناکۆکییەکان و بەڕێوەبردنی بەرژەوەندییەکانی گەل. ڕاشیگەیاند کە سووریا بەرەو قۆناغێکی نوێ هەنگاو دەنێت بۆ بنیاتنانەوەی نیشتمان و تاکی سووری، پەرلەمانیشی وەک سەکۆیەک بۆ ماف، دادپەروەری و چەسپاندنی کولتووری گفتوگۆ و سەروەری یاسا وەسف کرد.
لە کۆتایی پەیامەکەشیدا داوای لە هەمووان کرد پێکەوە کار بکەن بۆ دروستکردنی مێژوویەکی نوێ کە ڕەنگدانەوەی بەها و شارستانییەتی وڵاتەکە بێت.
لەلایەکی دیکەوە، محەمەد تەها ئەحمەد، سەرۆکی لیژنەی باڵای هەڵبژاردنەکان، ئەم ڕۆژەی بە وەرچەرخانێکی گرنگ ناوبرد کە تێیدا سووریا سەرکەوتووانە تۆزی شەڕی لەسەر خۆی تکاندووە و وەک وەفادارییەک بۆ قوربانییەکانی گەلی سووریا خەریکی داڕشتنەوەی پاشەڕۆژی خۆیەتی.
لە هەمان کاتدا، ئوسامە عەساف وەک بەتەمەنترین ئەندامی پەرلەمان، داوای لە لیژنەی یاسایی کاتی کرد کە ڕێوشوێنی پێویست بۆ بەڕێوەبردنی پرۆسەی هەڵبژاردن و جیاکردنەوەی دەنگەکان بگرنەبەر بە مەبەستی دیاریکردنی دەستەی سەرۆکایەتی نوێی ئەنجومەنی گەل.
