لە بەیاننامەیەکی ئەنجوومەنی یەکێتیی ئەورووپادا هاتووە کە یەکێتیی ئەورووپا سزاکانی بەسەر ئێران بۆ ماوەی ساڵێک درێژکردووەتەوە بەهۆی “پشتیوانیکردنی لە ڕووسیا و ناسەقامگیری لە ناوچەی ڕۆژهەڵاتی ناوەڕاست و دەریای سوور”.
لە ڕاگەیەندراوەکەی ئەنجوومەنی یەکێتیی ئەورووپادا هاتووە، “ئەنجوومەنی یەکێتی ئەورووپا سزاکانی سەر ئێرانی تا 27ـی تەمموزی 2025 درێژکردەوە، بەهۆی پاڵپشتیکردنی ڕووسیا و گرووپە چەکدارەکان و میلیشیاکان و دەریای سوور.”
مانگی ئایاری ڕابردوو، نووسینگەی ڕاگەیاندنی ئەنجوومەنی ئەورووپا ڕایگەیاندبوو، یەکێتییەکە سزای بەسەر تاک و دامەزراوە ئێرانییەکان و کۆریای باکووردا سەپاندووە.
لە بەیاننامەکەدا ڕوون کراوەتەوە “ڕووسیا فڕۆکەی بێفڕۆکەوانی دروستکراوی ئێران بەکار دەهێنێت، هەر بۆیەش بەرنامەی پەرەپێدان و بەرهەمهێنانی فڕۆکەی بێفڕۆکەوان کە لەلایەن دەوڵەتی ئێرانەوە دابین دەکرێت، بەشدارە لە پێشێلکردنی میساقی نەتەوە یەکگرتووەکان و بنەما سەرەتاییەکانی یاسا نێودەوڵەتییەکان”.
هەروەها محەممەد ڕەزا ئاشتیانی وەزیری بەرگری ئێران و ژمارەیەک بەرپرسی باڵای ئێران خرانە لیستی ڕەشەوە.
ئا:ج
