پارێزگاری کرماشان دەڵێت ئامانجیان ئەوەیە هەناردەی کەلوپەلی نانەوتی بۆ عێراق بگەیەننە پێنج ملیارد دۆلار لە ساڵێکدا.
“مەنووچەهر حەبیبی” پارێزگاری کرماشان، لە کۆبوونەوەی دەستەی پەرەپێدانی هەناردەی ئەم پارێزگایە، ڕایگەیاند: ئەمساڵ لە سنوورەکانی کرماشانەوە بایی دوو ملیارد و پێنج سەد ملیۆن دۆلار کەلوپەلی نانەوتی هەناردەی عێراق کراوە. ئەمەش لە پلانی پارێزگاکە زۆر دوورە و ئامانجیانە ئەم ژمارەیە بگەیەننە پێنج ملیارد دۆلار لە ساڵێکدا.
پارێزگای کرماشان سێ دەروازەی سنووریی لەگەڵ هەرێمی کوردستان و دەروازەیەکی سنووریی لەگەڵ عێراقدا هەیە.
پارێزگاری کرماشان دەڵێت یەکێک لە ئامانجەکانی پەرەپێدانی بازرگانیی دەرەکی لەم پارێزگایە ئەوەیە نیوەی هەناردەی ئێران بۆ عێراق لە ڕێگای ئەم چوار دەروازە سنوورییەوە بێت.
