بەهۆی بەردەوام‌یی قەیرانی نەبوونی گاز و کارەبا، ڕۆژی چوارشەممە ٢٤ پارێزگا لە کۆی ٣١ پارێزگای ئێران، ناوەندەکانی خوێندن و فەرمانگە حکومییەکانیان داخست. ئەمە لە کاتێکدایە کە قەیرانەکە کاریگەرییەکی بەرچاوی لەسەر ژیانی ڕۆژانەی هاوڵاتییان دروست کردووە.
بەپێی زانیارییەکان، لە تاران جگە لە نێوەندەکانی خوێندن و فەرمانگەکان، یەکە دادوەرییەکان و ڕێکخراوی بۆرسەش داخراون.
وەزارەتی پەروەردەی ئێران ڕایگەیاندووە، لەو پارێزگایانەی ناوەندەکانی خوێندن داخراون، هیچ چالاکییەکی خوێندن بە شێوەی ئۆنلاینیش بەڕێوە ناچێت، ئەمەش نیگەرانیی لای قوتابیان و خێزانەکانیان دروستکردووە.
شەوی ڕابردوو بەهۆی نەبوونی سووتەمەنیی پێویست بۆ وێستگەکانی بەرهەمهێنانی کارەبا، چەند گەڕەکێکی تاران بێ کارەبا مانەوە، ئەمەش بووە هۆی ناڕەزایەتیی دانیشتووانی ئەم شارە و بە دانی دروشم ناڕەزایەتییان دەربڕی. هاوکات، بۆ سێیەمین شەو لەسەر یەک، خەڵکی پارێزگای “کۆهگیلوویە و بویرئەحمەد” ڕژانە سەر شەقامان و دژی قەیرانی وزە ناڕەزایەتییان دەربڕی.
