پاش ئەوەی جێبەجێكردنی یاسای لێبوردنی گشتی ڕاگیرا، ژمارەی ئەو دەستگیركراوانە ئاشكرا دەكرێن كە لە جێبەجێكردنی یاساكە سوودمەند دەبوون.
ئەمڕۆ سێشەممە، 11ی 2ی 2025 ئاژانسی (شەفەقنیوز) بڵاوی كردووەتەوە، بەپێی سەرچاوەیەكی ئەنجوومەنی نوێنەرانی عێراق ئەو دەستگیرکراوانەی عێراق کە یاسای لێبوردنی گشتی دەیانگرێتەوە، ژمارەیان دەگاتە 57 هەزار و 280 كەس.
ئەمە لە كاتێكدایە دادگای باڵای فیدراڵی لە عێراق بڕیاری دا كاركردن بە یاساكانی لێبوردنی گشتی، باری کەسی، و گەڕانەوەی خانووبەرە بۆ خەڵكی ڕەسەنی كەركووك ڕابگرێت.
لە دانیشتنی ئەنجومەنی نوێنەرانی عێراق لە 21ی 1ی 2025 بڕیار لەسەر هەموارکردنەوەی یاسای لێبوردنی گشتی، هەموارکردنەوەی یاسای باری کەسی، هەروەها یاسای گەڕاندنەوەی موڵک و ماڵ بۆ خاوەنەکانیان لە کەرکوک درا.
ڕاگرتنی یاسای لێبوردنی گشتی كە بەلای سوننەكانەوە گرنگیی خۆی هەیە، بووەتە هۆی ناڕەزایی لەلایەن عەرەبی سوننە و لە چەند ڕۆژی ڕابردووشدا سێ پارێزگای سوننەنشین دەوامیی فەرمییان بەو هۆیەوە پەك خست.