شارێن هاسکێل، جێگری وەزیری دەرەوەی ئیسرائیل، دەسەڵاتی دیمەشقی بە “تیرۆریست” ناوبرد و گوتی خەریکی پاکتاوی نەژادین. ناوبراو داوای لە وڵاتانی ئەوروپا کرد چیتر بەرامبەر بە کۆمەڵکوژکردنی عەلەوی و دروزەکانی سووریا لە لایەن دەسەڵاتی دیمەشقەوە بێدەنگ نەبن.
هاسکێل ئاماژەی بەوە کرد بزووتنەوەی حەماس و جیهادییەکانی نێو سووریا خەریکە دەبن بە هەڕەشە بۆسەر ئیسرائیل و گوتی ئەوانیش ڕێگە بەمە نادەن.
” هاسکێل گوتی: “پێویستە کۆمەڵگای نێودەوڵەتی دژی ئەم ڕژێمە جیهادییەی دیمەشق بێتە دەنگ، هەروەک چۆن ئیسرائیل ئەمەی لە کانوونی یەکەمی پاردا کرد”
ناوبراو زیاتر ڕایگەیاند: “ئیسرائیل پابەندە بە ڕێگریکردن لەوەی ئەم هەفتەیە لە سووریا ڕوویدا لە سنوورەکانمان ڕوو بدات. کاتێک دەڵێین نیگەرانی ئاسایشی سنوورەکانمانین، مەبەستمان ئەو جیهادییانەیە خەریکی کۆمەڵکوژی و پاکتاوی نەژادییە دژی دروز و جوولەکەکانی سەر سنوورەکانمان”.
هاسکێل جەختی کردەوە هیچ کات ڕێگە نادەن مەترسیی جیهادییەکان لەسەر سنوورەکانیان لەگەڵ سووریا دروستبێت و گوتی: “هەزاران ئەندامی حەماس و جیهادییە ئیسلامییەکان لە سووریان و دەیانەوێت هێرش بکەنە سەر ئیسرائیل. پێویستە ئەوروپا بە ڕوونی دەنگ هەڵبڕێت لە بارەی کۆمەڵکوژکردنی عەلەوییەکان لە سووریا”.
