ئۆزگور ئۆزەل، سەرۆکی گشتیی جەهەپە، ڕەخنەی توند لە گوتارەکەی ڕەجەب تەیب ئەردۆغان، سەرۆککۆماری تورکیا دەگرێت و دەڵێت، ئەردۆغان دەیەوێت لەسەر بنەمای ئوممەت و مەزهەب سیاسەت بکات. ئۆزەل ڕایگەیاند، ئەردۆغان دەم پارتی وەک نوێنەری کورد، مەهەپە وەک نوێنەری تورک و ئاک پارتیش وەک نوێنەری عەرەب دەبینێت.
کاردانەوەکان دژی گوتارەکەی سەرۆککۆماری تورکیا لە کزلجەحەمامی ئەنقەرە بەردەوامن. ئەردۆغان باسی لە هاوپەیمانیی مێژوویی کورد و تورک و عەرەبی کردبوو و گوتبووی، لەمەودوا ئاک پارتی، مەهەپە و دەم پارتی پێکەوە بەردەوام دەبن.
ئۆزگور ئۆزەل ڕەخنەی لەوە گرت، ئەردۆغان لەبری “میللەت”، چەمکی “ئوممەت”ی داناوە و گوتی: “دەیەوێت لەژێر ناوی ئوممەتدا چەترێک دروست بکات و لەسەر بنەمای ئیسلامی سوننە، هاوپەیمانێتییەکی نوێ دابمەزرێنێت. ئێمە بۆ ئەوەی شەهید نەدرێت هەموو شتێک دەکەین، بەڵام ڕێگە نادەین لەسەر بنەمای ئوممەت و مەزهەبگەری کار بکەن. پێویستە ئێوە کوردەکان بە کەم سەیر نەکەن، کوردیش چیتر هەڵناخەڵەتێت. لە چوارچێوەی سنووری میساقی میللیدا، جێگەی هەموو هاووڵاتییانمان لەسەر سەر و چاومانە.”
میدیا کەمالیست و نزیکەکان لە جەهەپە، چالاکیی چەکدانان و سووتاندنی چەکی گرووپێکی چەکدارانی پەکەکە بە “شانۆگەری” ناودەبەن و بە ئاشکرا دژایەتیی خۆیان بۆ پرۆسەکە دەردەبڕن.
بەپێی هەمان میدیا، ئۆجەلان و ئەردۆغان و باخچەلی ڕێککەوتوون و دوای یەکەم هەنگاوی چەکدانان، حکوومەت هەنگاو دەنێت. لە چوارچێوەی ڕێککەوتنەکەدا، باس لە “مافی هیوا” بۆ ئۆجەلان، لێبووردنێکی سنووردار و جارێکی دیکە خۆکاندیدکردنەوەی ئەردۆغان دەکرێت. لەم ڕووەوە، ژمارەی کورسییەکانی هەر سێ پارتەکەش دەژمێردرێت و دەگوترێت، دەنگی هەر سێ پارتەکە دەتوانێت ڕێگە بۆ خۆکاندیدکردنەوەی ئەردۆغان خۆش بکات.
هەواڵی پێشوو