فاتمە موهاجرانی، گوتەبێژی حکوومەتی ئێران، ڕۆژی سێشەممە ڕایگەیاند، لانیکەم ١٠٦٢ کەس لە ئێران لە شەڕی ١٢ ڕۆژەی مانگی ڕابردوودا لەگەڵ ئیسرائیل گیانیان لەدەستداوە. لەو ژمارەیە، ١٠٢ کەسیان ژن و ٣٨ کەسیان منداڵ بوون. پێشتر، ئاماری فەرمیی کوژراوان بە ٩٣٥ کەس ڕاگەیەندرابوو.
ئیسرائیل لە ڕێکەوتی ١٣ی حوزەیران (٢٤ی جۆزەردان) هێرشێکی ئاسمانیی بەرفراوانی ئەنجام دا و دامەزراوە ئەتۆمییەکانی ئێرانی کردە ئامانج، کە لە ئەنجامدا چەندین فەرماندەی باڵای سەربازی و زانای ئەتۆمیی ئێرانی کوژران.
ئێرانیش لە وەڵامدا، ژمارەیەکی زۆر مووشەکی ئاراستەی بنکە سەربازییەکان، ژێرخانەکان و شارەکانی ئیسرائیل کرد. ئەمریکاش لە ٢٢ی حوزەیران (٢ی پووشپەڕ) هاتە ناو شەڕەکەوە و دامەزراوە ئەتۆمییەکانی ئێرانی بۆردومان کرد.
ئێران لە کاردانەوەدا، ١٤ مووشەکی ئاراستەی گەورەترین بنکەی ئاسمانیی ئەمریکا لە ڕۆژهەڵاتی ناوەڕاست کرد و هەروەها فڕۆکەی بێفڕۆکەوانیشی ئاراستەی بنکەکانی ئەمریکا لە عێراق کرد. ئەم هێرشانە لە وەڵامی بۆردومانکردنی دامەزراوە ئەتۆمییەکانی فەردۆ، نەتەنز و ئەسفەهان لەلایەن ئەمریکاوە لە ٢٣ی حوزەیران (٣ی پووشپەڕ) ئەنجام دران.
بەرپرسێکی ئەمریکایی ڕایگەیاند لەو هێرشانەدا هیچ زیانێکی گیانی ڕاپۆرت نەکراوە و ڕوونی کردەوە واشنتن پێشبینیی ئەم هێرشانەی کردبوو و پێشوەختە ڕێوشوێنی پێویستی گرتبووە بەر.
چەند کاتژمێرێک دواتر، دۆناڵد ترەمپ، سەرۆکی ئەمریکا، بە شێوەیەکی چاوەڕواننەکراو ئاگربەستی نێوان ئێران و ئیسرائیلی دوای ١٢ ڕۆژ لە پێکدادانی بێپێشینەی نێوان هەردوو وڵات ڕاگەیاند.
