یڵماز تونچ ڕایگەیاند، لە چوارچێوەی لێکۆڵینەوەکاندا ٢١ کەس لەو دەستگیرکراوانە بە تۆمەتی ئاگرکەوتنەوە و سووتاندنی دارستانەکان زیندانی کراون.
وەزیری دادی تورکیا، یڵماز تونچ، کە لە نزیکەوە چاودێریی هەوڵەکانی کوژاندنەوەی ئاگری دارستانەکانی کارابوکی دەکرد، ڕایگەیاند کە لە ماوەی یەک ڕۆژدا ٧٦ ئاگر کەوتوونەتەوە و هەموو دامەزراوە پەیوەندیدارەکان کاری پێویست بۆ کوژاندنەوەیان دەکەن.
تونچ گوتیشی، لە ٢٦ی حوزەیرانەوە، سەبارەت بە ئاگری دارستانەکانی ٣٣ شاری جیاواز لێکۆڵینەوە دەستی پێکردووە و لەو چوارچێوەیەدا ٩٧ کەس دەستبەسەر کراون.
وەزیری دادی تورکیا ئاشکراشی کرد کە لە ئەنجامی لێکۆڵینەوەکاندا، ٢١ کەس لە دەستبەسەرکراوان بە تۆمەتی دروستکردنی ئاگر و سووتاندنی دارستانەکان زیندانی کراون.
