کۆریای باکوور ڕایگەیاند، پێویستە ویلایەتە یەکگرتووەکانی ئەمریکا دان بەوەدا بنێت کە ڕاستییەکان لە دوای دیدارەکانی پێشووی نێوان سەرکردەکانی هەردوو وڵاتەوە گۆڕاون و هیچ دانوستانێک لە داهاتوودا ناتوانێت بەرنامە ئەتۆمییەکەی پیۆنگیانگ ڕابگرێت.
بەپێی هەواڵێکی ڕۆیتەرز، کیم یو جۆنگ، خوشکی بەهێزی ڕێبەری کۆریای باکوور و گوتەبێژی نافەرمیی کیم جۆنگ ئون، دان بەوەدا دەنێت کە پەیوەندیی کەسیی “نالەباری” لە نێوان براکەی و دۆناڵد ترەمپ، سەرۆکی پێشووی ئەمریکادا هەبووە، بەڵام هۆشداریی دا کە هەوڵدان بۆ بەکارهێنانی ئەم پەیوەندییە بۆ ناچارکردنی کۆریای باکوور بە چەکداماڵینی ئەتۆمی، تەنها دەبێتە “جێی گاڵتەجاڕی.”
ناوبراو ڕۆژی سێشەممە جەختی کردەوە، توانستە ئەتۆمییەکانی کۆریای باکوور و دۆخی جیۆپۆلەتیکیی جیهان، لە دوای سێ دیدارەکەی پێشووی کیم و ترەمپەوە گۆڕانکاریی بنەڕەتییان بەسەردا هاتووە و هەر جۆرە نکۆڵیکردنێک لە پێگەی پیۆنگیانگ وەک هێزێکی ئەتۆمی، بە توندی ڕەت دەکرێتەوە.
هاوکات، ئاژانسی هەواڵی فەرمیی کۆریای باکوور دەستپێکردنەوەی گەشتە ئاسمانییە ڕاستەوخۆکانی نێوان پیۆنگیانگ و مۆسکۆی بۆ یەکەمجار لە ماوەی دەیان ساڵی ڕابردوودا ڕاگەیاند و بە نیشانەی فراوانبوونی پەیوەندییە هەمەلایەنەکانی لەگەڵ ڕووسیادا وەسفی کرد.
کۆریای باکوور تۆمەتبار دەکرێت بە ناردنی چەک و هێز بۆ ڕووسیا لە شەڕی دژ بە ئۆکرانیا؛ هەنگاوێک کە ڕووبەڕووی ڕەخنەی ئەمریکا و هاوپەیمانەکانی بووەتەوە.
ئەم هەڵوێستە نوێیەی کۆریای باکوور، بەتایبەت لە کاتێکدا کە بە پشتیوانیی ڕووسیا پێگەی خۆی لە گۆڕەپانی نێودەوڵەتیدا بەهێز کردووە، نیشاندەری ڕێبازێکی توندترە بەرانبەر بە دانوستانەکانی داهاتوو لەگەڵ واشنتن و دەتوانێت هاوکێشە ئەمنییەکانی ڕۆژهەڵاتی ئاسیا ئاڵۆزتر بکات.
