لە میانی سەردانی مەسعوود پزیشکیان بۆ ئیسلاماباد، ئێران و پاکستان چەند ڕێککەوتننامەیەکیان واژۆ کرد کە بەپێی ئەوان، بڕیارە ئاڵوگۆڕی بازرگانیی نێوانیان بۆ ١٠ ملیار دۆلاری ساڵانە بەرز بکرێتەوە و هەردوو وڵات بۆ بەرەنگاربوونەوەی “تیرۆر” هاوکاریی زیاتر بکەن.
شەهباز شەریف، سەرۆکوەزیرانی پاکستان، ڕۆژی یەکشەممە لە کۆنفرانسێکی ڕۆژنامەوانیی هاوبەشدا لەگەڵ سەرۆککۆماری ئێران گوتی: “ئامانجی ١٠ ملیار دۆلار بازرگانیمان دیاری کردووە و هیوادارین لە زووترین کاتدا پێی بگەین.”
ناوبراو هەروەها هێرشی سەربازیی ئیسرائیلی بۆ سەر ئێران سەرکۆنە کرد و گوتی “هیچ پاساوێک” بۆ ئەو هێرشە بوونی نییە.
سەرۆککۆماری ئێران کە بۆ سەردانێکی دوو ڕۆژە لە پاکستانە، لە کۆنفرانسەکەدا ڕایگەیاند گەیشتن بە ئامانجی ١٠ ملیار دۆلار بازرگانی لەنێوان هەردوو وڵاتدا بە تەواوی دەستەبەرە. مەسعوود پزیشکیان بێ ئەوەی ئاماژە بە وردەکاریی زیاتر بکات، گوتی: “دەتوانین بە ئاسانی و لە ماوەیەکی کورتدا، قەبارەی پەیوەندییە بازرگانییەکانمان لە ٣ ملیار دۆلاری ئێستاوە بۆ ئاستی ١٠ ملیار دۆلار بەرز بکەینەوە.”
جگە لە پەیوەندییە بازرگانییەکان، هەردوو وڵات لە ساڵی ٢٠٠٩ گرێبەستێکی گازیان واژۆ کرد کە بەپێی آن، بڕیار بوو هێڵی بۆریی ئێران-پاکستان تا ساڵی ٢٠١٤ دروست بکرێت و ئێران لە سەرەتای ساڵی ٢٠١٥ەوە ڕۆژانە ٢١ ملیۆن مەتری سێجا گاز ڕادەستی پاکستان بکات. ئێران تا ساڵی ٢٠١٥ هێڵی گواستنەوەی گازی تا نزیک سنووری پاکستان دروست کرد، بەڵام پاکستان بەهۆی گەمارۆکانی ئەمریکا بۆ سەر ئێران، لە دروستکردنی هێڵی بۆرییەکە لە خاکی خۆیدا خۆی بوارد. دواجار حکوومەتی پاکستان دوای نزیکەی دەیەیەک لە دواخستن، لە مانگی ئاداری ئەمساڵدا، پلانی دروستکردنی هێڵی بۆریی سنووری بۆ وەرگرتنی ڕۆژانە ٢١ ملیۆن مەتری سێجا گازی لە ئێران پەسەند کرد.
ئەمە لە کاتێکدایە کە ئێران لە ساڵانی ڕابردوودا ڕووبەڕووی کەمبوونەوەی گاز بووەتەوە، کە لە وەرزە ساردەکاندا دەگاتە لوتکە و دیار نییە تەنانەت لە ئەگەری تەواوبوونی ئەم هێڵەشدا، توانای هەناردەکردنی گازی بۆ پاکستان هەبێت.
پەیوەندییەکانی ئێران و پاکستان لە قۆناغی جیاوازدا تووشی گرژی بوون. کۆتاییەکانی کانوونی دووەمی ڕابردوو، بەهۆی هێرشی مووشەکیی سوپای پاسداران بۆ سەر بنکەکانی گرووپی “جەیشولعەدل” لەناو خاکی پاکستان، قەیران دروست بوو و ئیسلاماباد هێرشێکی تۆڵەسەندنەوەی بۆ ناو خاکی ئێران ئەنجام دا. بەڵام دواتر هەردوو وڵات ڕایانگەیاند کە ئەو گرژییەیان تێپەڕاندووە.
