بەڕێوەبەری ناوەندێکی ڕاپرسی لە ئێران، کە بە مۆڵەتی حکوومەت کار دەکات، دەڵێت دوای شەڕە ١٢ ڕۆژییەکەی نێوان ئێران و ئیسرائیل، شەڕ چووەتە نێو ژیانی ڕۆژانەی خەڵکەوە و “زیاتر لە ١٥٪”ی تارانییەکان بیریان لە کۆچکردنی هەمیشەیی لە پایتەخت کردووەتەوە.
ئیبراهیم شیرعەلی، سەرۆکی ناوەندی ڕاپرسیی خوێندکارانی ئێران (ئیسپا)، لە کۆبوونەوەیەکی پسپۆڕیدا لەبارەی “خۆڕاگریی تاران” گوتی: “شەڕە ١٢ ڕۆژییەکە خێزانەکان، هاووڵاتییان و ژێرخانە شارییەکانی کردە هێڵی پێشەوەی جەنگ و شەڕ بووە بەشێک لە ژیانی ڕۆژانە و کۆمەڵایەتی و ئابووریی خەڵک.”
ئەمە لە کاتێکدایە کە بە گوتەی ناوبراو، ساڵانێکە تاران لە دۆخێکی نائاسایی و مەترسیی جۆراوجۆردایە، لەوانە کێشەی ژینگەیی، هەژاری و نایەکسانی، قەیرانی نیشتەجێبوون و بەهای کرێ، کەمیی وزە و ئاو، کێشەکانی گواستنەوە و هەروەها بەڕێوەبردنی نادیموکراتییانەی شار.
بەپێی ڕاپرسییەکەی ئیسپا کە دوای ئاگربەست لە تاران ئەنجام دراوە، زیاتر لە ٧٣٪ی خەڵک بە توندی نیگەرانی هەڵاوسان و بەرزبوونەوەی نرخەکان بوون، ٥٥٪ ترسیان لە دووبارەبوونەوەی شەڕ هەبووە، نزیکەی نیوەی هاووڵاتییان گوتوویانە لە ئەگەری دووبارەبوونەوەی شەڕدا، بەرگەی دۆخەکە ناگرن و زیاتر لە نیوەشیان باسیان لە دۆخی دەروونیی نالەبار و سترێسی توند کردووە.
عەلی خامنەیی، ڕێبەری کۆماری ئیسلامی، کە ساڵی ٢٠١٨ گوتبووی “نە شەڕ دەبێت و نە دانوستان دەکەین،” لە شەشەمین ڕۆژی شەڕە ١٢ ڕۆژییەکەدا ئیدعای کرد “ژیانی ئاسایی لە ئێران بەردەوامە.”