کۆشکی کرملین ڕایگەیاند کە ڤلادیمێر پوتن، سەرۆککۆماری ڕووسیا، و بنیامین نەتانیاهوو، سەرۆکوەزیرانی ئیسرائیل، ڕۆژی دووشەممە لە گفتوگۆیەکی تەلەفۆنیدا سەبارەت بە دۆخی ڕۆژهەڵاتی ناوین، لەوانە پلانی سەرۆککۆماری ئەمریکا بۆ کۆتاییهێنان بە شەڕ و پێکدادانەکان لە غەزە، گفتوگۆیان کردووە.
بەگوێرەی بەیاننامەی کرملین، هەردوولا جەختیان لەسەر خواستە هاوبەشەکانیان بۆ دۆزینەوەی چارەسەری دانوستاندنی بۆ پرۆگرامە ناوکییەکەی ئێران و سەقامگیرترکردنی دۆخەکە لە سووریا کردەوە.
ئەمە لە کاتێکدایە کە مۆسکۆ لە مانگەکانی ڕابردوودا هەڵوێستێکی ڕەخنەگرانەی بەرانبەر بە ڕەفتارەکانی ئیسرائیل لە ڕۆژهەڵاتی ناوین هەبووە و هێرشەکانی ئەم وڵاتەی بۆ سەر ئێران و قەتەر مەحکوم کردووە. ڕووسیا هەروەها یەکێک بوو لە پاڵپشتە سەرەکییەکانی بەشار ئەسەد، سەرۆککۆماری پێشووی سووریا، کە ساڵی ڕابردوو حکوومەتەکەی لە کاتی پێشڕەویی هێزە ئیسلامییەکاندا ڕووخێندرا.