سەرۆکی کۆمیسیۆنی ئاوەدانکردنەوە و گواستنەوەی ئەنجوومەنی شاری تاران ڕایگەیاند کە ژمارەی قوربانییانی ڕووداوەکانی هاتوچۆ لە پایتەختدا نزیکەی دوو هێندە بووەتەوە و ئێستا بە تێکڕا ڕۆژانە سێ کەس بەهۆی ڕووداوەکانی شۆفێرییەوە لە شارەکەدا گیان لەدەست دەدەن.
جەعفەر تەشکوری هاشمی، ڕۆژی سێشەممە، ٢٧ی تشرینی دووەم، بە ئاماژەدان بە ڕووداوی کوشندەی ڕۆژێک پێشتر لە هێڵی تایبەتی پاسی شەقامی چەمەران و ڕووداوە هاوشێوەکان لە گەورەڕێگاکانی تاران، دۆخی سەلامەتیی ڕێگاکانی بە “قبوڵنەکراو” وەسف کرد. ئێوارەی ڕۆژی دووشەممە، لە ڕووداوێکی پێکدادانی پاسێکی بی ئاڕ تی لەگەڵ دوو ماتۆڕسکیل لە گەورەڕێگای چەمەرانی تاران، کەسێک گیانی لەدەست دا و دوو کەسی دیکەش بریندار بوون.
ناوبراو ڕەخنەی لە دواکەوتنی نزیکەی ٥٠ خولەکیی ئەمبوڵانس گرت لە گەیشتن بە شوێنی ڕووداوەکە و گوتی ئەگەر کەمیی ئۆتۆمبێل هەیە، بەرپرسانی فریاکەوتن دەبێت لە ئەنجوومەن ڕوون کردنەوە بدەن و بودجەی پێویست بۆ کڕینی ئەمبوڵانس دابین بکرێت.
ئەو ڕوونیشی کردەوە کە ئەم ئاماری قوربانییانی ڕووداوەکانی هاتوچۆ لە تاران نزیکەی دوو هێندەی ساڵی ١٤٠٠ (٢٠٢١)ە و گوتی: “لێرە نە غەززەیە، نە سوودان و نە مەیدانی شەڕ. لێرە شارێکە کە خەڵک بۆ ژیانی ئاسایی لە ماڵ دێنە دەرەوە، بەڵام بە تێکڕا ڕۆژانە سێ کەس بەهۆی ڕووداوی هاتوچۆوە گیان لەدەست دەدەن.”
پۆلیسی هاتوچۆی تاران ئەم هەفتەیە ڕایگەیاند کە گەنجانی تەمەن ٢٠ تا ٣٠ ساڵ زۆرترین قوربانییانی ڕووداوەکانی هاتوچۆی شارەکانی تاران بوون لە مانگی گەڵاڕێزاندا.
