ڕەجەب تەیب ئەردۆغان، سەرۆک کۆماری تورکیا، دوای کۆبوونەوەی کابینەی حکومەتەکەی ڕۆژی یەکشەممە، ١ی کانوونی یەکەمی ٢٠٢٥، و لە لێدوانەکانی ئەم دواییەیدا جەختی لەسەر پابەندبوونی “ڕەها و نەگۆڕی” حکومەتەکەی بە بەدیهێنانی “تورکیایەکی بێ تیرۆر” کردەوە. ئەردۆغان ئاماژەی بەوە دا کە ئەم پرۆسەیە پرۆژەیەکی نیشتمانیی گشتگیرە و ئامانجی ئاشتی، ئاسایش و سەقامگیرییە بۆ تورکیا و دەڤەری فراوانتر.
گوتی پرۆسەیەکی هەستیار بەڕێوە دەبەن، لە هەوڵدان لە ڕێگەی قۆناغی “تورکیای بێ تیرۆر”، یەکێک لە گەورەترین بەربەستەکانی بەردەم گەشەپێدانی ئابووری، ئاشتی و برایەتی لەناو ببەن. سەرۆک کۆمار دووپاتی کردەوە کە “تورکیای بێ تیرۆر” ڕێڕەوی برایەتی لە دەڤەرەکەدا دادەمەزرێنێت، پیلانە قێزەونەکان لادەبات، یارییە تێکدەرانەکان تێک دەدات و دەرگای بەڕووی سەردەمێکی نوێدا دەکاتەوە. هەروەها جەختی لەوە کردەوە کە یەکگرتوویی تورکیا لەگەڵ خوشک و برایانی کورد و عەرەب لە دەڤەرەکەدا، ڕیشەیەکی مێژوویی قووڵی هەیە و لە داهاتووشدا هەر وا دەبێت. ئەردۆغان هۆشداریدا لە هەوڵە “خیانەتکارانەکان”ی نەیارانی ناوخۆیی و دەرەکی بۆ لەباربردنی ئەم پرۆسەیە. گوتی تورکیا لەو ڕێگایەی هەڵی بژاردووە، پاشگەز نابێتەوە و بێ گومان بە ئامانجەکانی خۆی دەگات. پرۆسەی “تورکیای بێ تیرۆر” لە ٢٢ی تشرینی یەکەمی ٢٠٢٤ دەستی پێ کرد و بە هەستیاری و وریاییەوە بەڕێوە چووە.
