سوپای ئیسرائیل، ئێوارەی چوارشەممە، ڕایگەیاند جارێکی دیکە هێرشی کردووەتە سەر پێگەکانی حزبوڵڵا لە لوبنان.
بەپێی ڕاگەیەندراوی سوپای ئیسرائیل، ئەو ئامانجانە بریتی بوون لە کۆگاکانی چەک، سەکۆی هەڵدانی مووشەک و دامەزراوەکانی تایبەت بە هەڵگرتنی کەرەستەی تەکنیکی. پێشتر میدیاکانی لوبنان هەواڵی هێرشی ئاسمانیی ئیسرائیلیان بۆ سەر باشووری ئەو وڵاتە بڵاو کردبووەوە.
لە کۆتاییی مانگی تشرینی دووەمی ساڵی ڕابردووەوە، ئاگربەستێک لەنێوان ئیسرائیل و حزبوڵڵادا لە لوبنان هەیە. لەگەڵ ئەوەشدا، ئیسرائیل کە داوای چەکداماڵینی تەواوەتیی ئەو گرووپە چەکدارییەی نزیک لە ئێران دەکات، نزیکەی ڕۆژانە بەردەوامە لە هێرشکردنە سەر پێگەکانی لە ناوچە جیاجیاکانی لوبناندا.
سوپای لوبنان ڕاسپێردراوە پیلانێک بۆ چەککردنی حزبوڵڵا ئامادە بکات. بەپێی بەرنامەکە، دەبێت تا کۆتاییی ئەمساڵ (٢٠٢٥) سەرجەم چەکەکان لە لوبناندا تەنها لەژێر دەسەڵاتی دەوڵەتدا بن.
حزبوڵڵا چەندین جار جەختی کردووەتەوە کە ئامادە نییە ئەمە قبووڵ بکات و تەنها کاتێک چەک دادەنێت کە سوپای ئیسرائیل هێرشەکانی ڕابگرێت و هێزەکانی لەو پێنج بنکە سەربازییەی لە باشووری لوبنان ماون، بکشێنێتەوە.
هەواڵی پێشوو