بەرپرسانی خۆجێی لە پارێزگای کەهگیلویە و بۆیەرئەحمەدی ئێران ڕایانگەیاند، سێ کەس بە هۆی لافاوی ڕووبارێکەوە کە بەهۆی بارانبارینی بەخوڕەوە هەستابوو، لە شارستانی کەهگیلویە، گیانیان لەدەست دا. ئەم ڕووداوە لە گوندی سەرپەری ڕوویدا و گەڕان بەدوای تەرمی یەکێک لە قوربانییەکاندا هێشتا بەردەوامە.
پەرویز غەفار فەرد، سەرۆکی نێوەندی ڕووداو و فریاگوزارییە پزیشکییەکانی کەهگیلویە و بۆیەرئەحمەد، ڕۆژی دووشەممە، کانوونی یەکەمی ٩، لە گفتوگۆیەکدا لەگەڵ میدیاکاندا گوتی ئەو سێ کەسە لە ڕووباری “درە لەبک” لە نزیک شاری دەهدەشت، ناوەندی شارستانی کەهگیلویە، خنکان.
بە گوتەی ئەو، ڕووداوەکە کاتێک دەستی پێ کرد کە شۆفێرێک بە ئۆتۆمبێلەکەی لە ڕووبارەکە دەپەڕیەوە و بە هۆی لافاوە بەهێزەکە خنکا. دوو کەسی دیکە کە لە نزیک شوێنی ڕووداوەکە بوون، بۆ ڕزگارکردنی چوونە ناو ئاو، بەڵام ئەوانیش لەناو لافاوەکەدا گیانیان لەدەست دا.