ڕێکخراوی پزیشکانی بێ سنوور لە نوێترین ڕاپۆرتی خۆیدا هۆشدار دەدات زۆربەی ئەو پەنابەرە ئەفغانستانییانەی بە شێوەی بەکۆمەڵ لە پاکستان دەرکراون، لە کەمپی کاتی و بێ پەناگەی گونجاودا نیشتەجێ کراون و دەستگەیشتنیان بە خزمەتگوزاریی تەندروستی، ئاوی خواردنەوەی پاک و خۆراک زۆر سنووردارە.
بەپێی ڕاپۆرتەکە، دەرکردنی بەزۆری کۆچبەرانی بێ بەڵگەنامە، ئەو کەسانەی کارتی وڵاتینامەی ئەفغانستان و کارتی تۆمارکردنی کاتییان هەیە گرتووەتەوە؛ بەهۆی سەختیی سەرمای زستان لە ناوچەکەدا دۆخەکە زۆر مەترسیدار بووە.
پزیشکانی بێ سنوور دووپاتی کردەوە بەبێ پەناگەی پێویست، چاودێریی پزیشکی و خۆراک، وەرزی زستان بۆ پەنابەرانی ئەفغانستانی دەبێتە بکوژێکی بێدەنگ و هەڕەشە لە مانەوەی زۆربەی کەسە آسیبپێگەیشتووەکان دەکات.
“شوو ویبینگ”، سەرۆکی نێردەی پزیشکانی بێ سنوور لە پاکستان گوتی خێزانە ئەفغانستانییەکان لەنێوان ژیان لە ترس و دڵەڕاوکێی دەرکردن و گەڕانەوە بۆ ئەفغانستاندا گیریان خواردووە؛ هەروەها داوای لە کۆمەڵگەی نێودەوڵەتی کرد هاوکاریی مرۆیی و پاراستنی بەپەلە پێشکەش بکەن.
بەپێی ڕاپۆرتی دامەزراوەکانی نەتەوە یەکگرتووەکان، پەنابەرانی ئەفغانستانی لە ئێستادا ڕووبەڕووی تەحدای دژوار بوونەتەوە، لەوانە سنوورداریی دەستگەیشتن بە خزمەتگوزاریی تەندروستی، بەدخۆراکی و قەرەباڵغیی پەناگەکان، کە ئەم دۆخە لە کەشوهەوای زۆر ساردی زستاندا بە شێوەیەکی بەرچاو سەختتر دەبێت.