ڕێکخراوی کۆچی نێودەوڵەتی ڕایگەیاند بەلەمێکی کۆچبەران لە دەریای ناوەڕاست و نزیک کەناراوەکانی لیبیا وەرگەڕاوە؛ تەنها دوو ژن ڕزگارکراون و ٥٣ کەس کوژراون یان بێسەروشوێنن.
ڕێکخراوی کۆچی نێودەوڵەتی ڕایگەیاند بەلەمەکە لە ٦ی ئەم مانگە لە باکووری شاری زووارای لیبیا وەرگەڕاوە و ٥٥ سەرنشینی هەبووە. دەسەڵاتدارانی لیبیا ئۆپەراسیۆنی گەڕان و ڕزگارکردنیان دەستپێکردووە.
بەپێی راپۆرتەکان، ٥٣ کەس یان گیانیان لەدەستداوە یان بێسەروشوێنن و تەنها دوو ژنی نەیجیری ڕزگارکراون. یەکێک لە ڕزگاربووەکان گوتووە هاوسەرەکەی لەدەستداوە و ئەوی دیکە گوتووە دوو منداڵی ساوای لە کارەساتەکەدا لەدەستداوە.
