وەزارەتی دەرەوەی هیندستان هێرشکردنە سەر کەشتییەک بە ئاڵای وڵاتەکەی لە نزیک کەناراوەکانی عومان بە “قبووڵنەکراو” وەسف کرد. ڕێکخراوەکانی چاودێریی دەریایی ڕایان گەیاند ئەو کەشتییە بارهەڵگرە دوێنێ کراوەتە ئامانج و نوقم بووە.
دێلهی وردەکاریی زیاتری دەربارەی هێرشەکە نەخستە ڕوو، بەڵام ڕای گەیاند هەموو تیمی کەشتییەکە سەلامەتن و سوپاسی بەرپرسانی عومانیشی بۆ ڕزگارکردنی گیانی تیمی کەشتییەکە کرد.
لە بەیاننامەی وەزارەتی دەرەوەی هیندستاندا ٢٤ی بانەمەڕ بڵاو کرایەوە، هاتووە: “هێرشکردنە سەر کەشتییەک بە ئاڵای هیندستان لە کەناراوەکانی عومان لە ڕۆژی ڕابردوودا قبووڵنەکراوە. ئێمە زۆر نیگەرانین کەشتییە بازرگانییەکان و دەریاوانە سڤیلەکان هێشتا دەکرێنە ئامانج.”
کۆمپانیای ئاسایشی دەریایی “ڤانگارد” ناوی ئەو کەشتییەی “حاج عەلی” ڕاگەیاند. کەشتییەکە ١٤ تیمی هەبووە و ڕۆژی چوارشەممە لە باشووری گەرووی هورمز، دوای تەقینەوەیەک لە نزیکی نوقم بووە.
کۆمپانیای ڤانگارد دەڵێت ئەو کەشتییە ئاژەڵی زیندووی لە ناوچەی سۆمالیلاندەوە بۆ بەندەری شاریقە لە میرنشینە یەکگرتووە عەرەبییەکان دەگواستەوە و بەهۆی “تەقینەوەیەکی گوماناوی پێدەچێت ناشی لە هێرشی درۆن یان مووشەک بووبێت” ئاگری گرتووە.
ماڵپەڕی چاودێریی هاتوچۆی کەشتییەکان ئەو کەشتییەی وەک لەنجێکی دارین بە درێژیی ٥٤ مەتر ناساندووە.
عەباس عێراقچی لە گوتارەکەیدا لە دێلهی ئاماژەی بەو هێرشە نەکرد، بەڵام جەختی کردەوە گەرووی هورمز “بۆ هەموو ئەو کەشتییە بازرگانییانەی لەگەڵ هێزی دەریایی ئێران هاوکاری دەکەن، کراوەیە.”
هەواڵی پێشوو