میدیا فەلەستینییەکان بڵاویان کردەوە ئەنجامە بەراییەکانی هەڵبژاردنی کۆمیتەی ناوەندیی بزووتنەوەی فەتح، وەک دامەزراوەیەکی بچووکی سەرکردایەتیی ئەم بزووتنەوەیەی دەسەڵاتی فەلەستینی بەڕێوە دەبات، دیاری کراون.
بزووتنەوەی فەتح لەلایەن مەحموود عەباس، سەرۆکی دەسەڵاتی فەلەستینییەوە سەرکردایەتی دەکرێت و کۆمیتەی ناوەندییەکەی نزیکەی ٢٠ ئەندامی هەیە.
بەگوێرەی ئەم ڕاپۆرتانە، یاسر عەباس، کوڕی مەحموود عەباس، وەک یەکێک لە ئەندامانی کۆمیتەی ناوەندی هەڵبژێردراوە. ماجید فەرەج، سەرۆکی دەزگای هەواڵگریی گشتیی فەلەستین و یەکێک لە کەسایەتییە نزیکەکانی مەحموود عەباس، لە نێو هەڵبژێردراواندایە.
هەروەها لەیلا غەنام، پارێزگاری ڕامەڵا لە کەسە نزیکەکانی مەحموود عەباس دادەنرێت، وەک ئەندامی نوێی کۆمیتەی ناوەندی هەڵبژێردراوە.
بەپێی ڕاپۆرتەکان، حوسێن شێخ، جێگری مەحموود عەباس لە دەسەڵاتی فەلەستینی و ڕێکخراوی ڕزگاریخوازی فەلەستین، هەروەها جەبریل ڕەجووب و مەحموود عەلوول، جێگری عەباس لە بزووتنەوەی فەتح، کورسییەکانی خۆیان لەم کۆمیتەیەدا پاراستووە.
ئەنجامە ڕاگەیەندراوەکان هێشتا فەرمی نین. ئەم هەڵبژاردنە لە چوارچێوەی هەشتەمین کۆنگرەی بزووتنەوەی فەتح لە کاتی دامەزراندنییەوە لە نزیکەی ٦٠ ساڵ لەمەوپێش بەڕێوە دەچێت.
پێش دەستپێکردنی ئەم کۆبوونەوەیە، میدیا عەرەبییەکان بڵاویان کردەوە مەحموود عەباس بە شێوەیەکی نائاسایی ئەم کۆنگرەیەی ساز کردووە تا کەسایەتییە نزیکەکانی خۆی بباتە نێو دامەزراوەی بچووکی سەرکردایەتیی فەتحەوە.
