ئەمڕۆ شەممە، ٣٠ـی ئایاری ٢٠٢٦، بازاڕەکانی کانزا گرانبەهاکان گۆڕانکاری نوێیان بەخۆوە بینی؛ دوای ئەو دابەزینانەی لە ڕۆژانی ڕابردوودا تۆمارکرابوون، نرخی زێڕ لە بازاڕەکانی جیهان و ناوخۆدا بەڕێژەیەکی بەرچاو ڕووی لە بەرزبوونەوە کردەوە، لە کاتێکدا نرخی زیو کەمێک بە جێگیری ماوەتەوە.
لە بازاڕە جیهانییەکاندا، نرخی یەک ئۆنسە زێڕ بازدانی بەخۆوە بینی و بەرزبووەوە بۆ 4,540.53 دۆلار، یەک کیلۆگرام گەیشتە 145,981.43 دۆلار و یەک گرامیش بە 145.98 دۆلار مامەڵەی پێوە دەکرێت. هاوكات لە بازاڕەکانی ناوخۆشدا و بەپێی نرخی فەرمی سەندیکای زێڕنگران، عەیارەکان بەهایەکی بەرزتریان بەدەستهێنایەوە و بەم شێوەیە جێگیر بوون؛ عەیارەی ٢٢ بە 1,020,640 دینار، عەیارەی ٢١ بە 974,247 دینار و عەیارەی ١٨ بە 835,069 دینار مامەڵەی پێوە دەکرێت.
لەلایەکی دیکەوە، بازاڕی زیو جووڵەیەکی کەمتر و هێمنتری بەخۆوە بینی، بە جۆرێک لە ئێستادا نرخی هەر ئۆنسەیەک زیو لەسەر 75.23 دۆلار جێگیر بووە، هەر کیلۆگرامێک بە 2,418.76 دۆلار مامەڵەی پێوە دەکرێت و نرخی هەر گرامێکیش لەسەر 2.42 دۆلارە.
سەبارەت بە هۆکاری ئەم گۆڕانکارییانە، شرۆڤەکارانی بازاڕە داراییەکان ڕایدەگەیەنن کە دروستبوونی گەشبینی بە ئەگەری ڕێککەوتنی نێوان ئەمریکا و ئێران لە دوو ڕۆژی ڕابردوودا کاریگەری گەورەی هەبووە؛ بەو پێیەی دابەزینی نرخی نەوت و دۆلاری ئەمریکی بوونەتە هاندەری سەرەکی بۆ بەرزبوونەوەی دووبارەی نرخی زێڕ لە بازاڕەکاندا.