ب ئامادەبوونا بەرپرسێن حزبی و حکومی و کەسوکارێن سەربلندێن شەهیدان، ل قەزایا شێخان ڕێورەسمەکا شایستە بۆ بیرئینانا ٥٧ ساڵەیا تاوانا کۆمەڵکوژییا ئەشکەفتا دەکان هاتە گێڕان، کو ژ لایێ ڕژێما بەعسا ژناڤچووی ڤە دەرهەق ب وڵاتیێن سڤیل هاتبوو ئەنجامدان.
ئەڤرۆ سێشەمبی، ١٨ێ تەباخا ٢٠٢٦ێ، ب چاڤدێرییا وەزارەتا کاروباری شەهید و ئەنفالکریان و ل هۆڵا پەروەردا شێخان، ب ئامادەبوونا د. عەلی تەتەر، پارێزگارێ دهۆکێ، سالح حەیدەر، بەرپرسێ لقێ ٢٠ێ یێ پارتی دیموکراتی کوردستان، د. نافسەر نوری، بریکارێ وەزارەتا شەهیدان و سەردار شێخ یەحیا، قایمقامێ شێخان و ژمارەکا بەرپرسێن کارگێڕی و لەشکری، یادی ٥٧ ساڵەیا شەهیدکرنا وڵاتیێن دەڤەرێ د ناڤ ئەشکەفتا دەکان دا هاتە ساخکرن.
د ڕێورەسمەکەدا، تیشک خرایە سەر دڕندەییا ڕژێما بەعس ل سالا ١٩٦٩ێ، دەما کو ب شێوەیەکێ دوویر ژ مرۆڤایەتیێ کۆمەڵکوژییا خەڵکێ سڤیل ل ئەشکەفتا دەکان ئەنجامدای. ئامادەبوویان دووپات کر کو ئەڤ تاوانە وەک برینەکا کوور د مێژوویا گەلێ کورد دا دێ مینیت و پێدڤییە نەوەیێن نووی ل سەر ڤان قوربانییان بهێنە پەروەردەکرن.
کۆمەڵکوژییا ئەشکەفتا دەکان ل ١٨ێ تەباخا ١٩٦٩ێ قەویمی، کو تێدا ڕژێما دکتاتۆرا بەعس ب سۆتنی و خەندقاندنی، ژمارەکا زۆر یا ژن و زارۆک و پیر و گەنجێن دەڤەرێ د ناڤ ئەشکەفتێ دا شەهید کرن، ئەڤە ژی وەک پشکەک ژ زنجیرە تاوانێن تەتەیکرنا ڕەگەزی دژی گەلێ کوردستانێ دهێتە هەژمارتن.
