بە مەبەستی لەنزیکەوە ئاگاداربوون لە هەنگاوەکانی پەرەپێدانی دەزگا ئەمنییەکان، ڕالف شرۆدەر، سەرۆکی دەستەی ڕاوێژکارانی یەکێتی ئەوروپا لە عێراق و شاندێکی یاوەری، سەردانی بەڕێوەبەرایەتی پۆلیسی پارێزگای هەولێریان کرد.
لە دیدارەکەدا، کە ئەمڕۆ سێشەممە بەڕێوەچوو، شاندی میوان لەلایەن عەمید کامل بەرزنجی، بەڕێوەبەری پۆلیسی پارێزگای هەولێر پێشوازییان لێکرا. لە کۆبوونەوەکەدا لیژنەی باڵای چاکسازیی پۆلیسی کوردستان بە سەرۆکایەتی خاتوو ڕۆندک فارس، بەڕێوەبەری ئەکادیمیای سەرکردایەتی و بەڕێوەبردن لە وەزارەتی ناوخۆ، تیمی پرۆگرام ئۆفیس و عەمید سامان حەسەن ئامادەبوون.
بەگوێرەی ڕاگەیەندراوێکی پۆلیسی هەولێر، ئامانجی سەرەکی سەردانەکە بەسەرکردنەوەی مەیدانیی قۆناغەکانی پڕۆسەی چاکسازیی پۆلیس بوو لە پارێزگاکە، بە تایبەتی بەسەرکردنەوەی “بنکەی پۆلیسی نموونەیی کەسنەزان” وەک نموونەیەکی سەرکەوتووی پەرەپێدانی بنکەکانی پۆلیس.
لە لایەن خۆیانەوە، دەستەی ڕاوێژکاری یەکێتی ئەوروپا دەستخۆشییان لە هەوڵەکانی پۆلیسی کوردستان کرد بۆ سەرخستنی گۆڕانکارییەکان و دووپاتیان کردەوە کە بەردەوام دەبن لە پێشکەشکردنی پاڵپشتی و ڕاوێژ بۆ ئەم پرۆسەیە.
جێی ئاماژەیە، وەزارەتی ناوخۆی حکومەتی هەرێمی کوردستان خاوەندارێتی پڕۆسەی چاکسازی پۆلیسی نیشتمانیی کوردستان (٢٠٢٦– ٢٠٣٠) دەکات، کە پڕۆژەیەکی ستراتیژییە و لەلایەن دەستەی ڕاوێژکارانی یەکێتیی ئەوروپاوە پاڵپشتی دەکرێت بۆ نێودەوڵەتیکردنی کارەکانی پۆلیس و بەرزکردنەوەی ئاستی خزمەتگوزارییە ئەمنییەکان.