ڕۆژی سێشەممە ١ی ئەیلوول پۆلیسی کاتماندۆ ژمارەی قوربانیانی کارەساتی لافاوی لە نیپاڵ ١٠٠٧ کەس ڕاگەیاند و ژمارەی بێسەروشوێنبووان گەیشتووەتە نزیکەی ٤٦٠٠ کەس. چاوەڕوان دەکرێت ژمارەی قوربانیان لە ڕۆژان و هەفتەکانی داهاتوودا زیاتریش ببێت.
لە کاتی ڕوودانی ئەم کارەساتەوە لە چوارشەممەی ڕابردوو، هێشتا سەدان هاووڵاتیی بیانی بێسەروشوێنن. بەپێی ڕاپۆرتەکان، لە نیپاڵ ٥٨٣ هاووڵاتیی بیانی لە زیاتر لە ٣٠ نەتەوە بێسەروشوێن بوون. لە چینیش ئاماری بیانییە بێسەروشوێنبووەکان، ٢٦١ کەس لە ٢٣ وڵات ڕاگەیەندراوە. ئۆپەراسیۆنی گەڕان لە نێو قەبارەیەکی گەورەی وێرانی و داروپەردوودا بە بەشداریی هەزاران کارمەندی فریاگوزاری بەردەوامە.
بە گوێرەی ئاژانسی هەواڵی ئەڵمانیا، تیمەکانی فریاگوزاری و ڕزگارکردن هێدی هێدی توانیویانە لە ڕێگەی وشکانییەوە بگەنە ناوچە شاخاوییە دوورەدەست و زیانپێگەیشتووەکان. پێشتر ئۆپەراسیۆنی فریاگوزاری بە شێوەیەکی سەرەکی لە ڕێگەی ئاسمانییەوە بەڕێوە دەچوو.
لافاو لە هیمالایا لە ناوچەی سنووریی نێوان چین و نیپاڵ، لە ئەنجامی شکانی بەشێک لە سەهۆڵبەندێکی سروشتی ڕووی دا. ئەم ڕووداوە بووە هۆی داڕمانی قەبارەیەکی گەورە لە سەهۆڵ و بەرد و قوڕوچڵپ و بە شێوەی لافاوێکی کتوپڕ ڕژایە نێو ڕووبارەکانی ناوچەکە و ماڵەکان، وێستگەکانی بەرهەمهێنانی کارەبای ئاوی و پردەکانی سەر ڕێڕەوی لافاوەکەی وێران کرد و لەگەڵ خۆیدا بردیانی.
توێژەران گەرمبوونی زەوی بە هۆکاری ئەم ڕووداوە دەزانن. زانایان دەڵێن لافاوەکە بەهۆی نائارامیی سەهۆڵبەندی سروشتی لە ئەنجامی لێکەوتە درێژخایەنەکانی گۆڕانی کەشوهەوادا ڕووی داوە.