ئێوارەی ئەمڕۆ یەکشەممە، ٦ی ئەیلوولی ٢٠٢٦، بە ئامادەبوونی ژمارەیەک لە وەزیرانی حکومەتی هەرێمی کوردستان، پارێزگاری هەولێر، وتەبێژانی سەرۆکایەتی هەرێم و حکومەت، سەرکردەی لایەنە سیاسییەکان، دیپلۆماتکاران و کۆمەڵێک لە بازرگان و وەبەرهێنەران، مەراسیمی ٦٠ەمین ساڵیادی دامەزراندنی ژووری بازرگانی و پیشەسازیی هەولێر بەڕێوەچوو.
لە مەراسیمەکەدا ئومێد خۆشناو، پارێزگاری هەولێر، وێڕای ئاڕاستەکردنی پیرۆزبایی حکومەتی هەرێمی کوردستان بە سەرۆک و ئەندامانی ژوورەکە، هیواخواز بوو ئەم بۆنەیە ببێتە هاندەرێک بۆ بەهێزکردنی ژێرخانی بازرگانی و گەشەپێدانی زیاتری کەرتی پیشەسازی لە پایتەخت.
پارێزگاری هەولێر ئاماژەی بە مێژووی کاری سەربەخۆ و پیشەوەری لە شارەکەدا کرد و گوتی: “خەڵکی هەولێر هەمیشە دەستڕەنگین بوون لە کاری دەستپێکەوە تا داهێنانی گەورە لە کۆمپانیا کەرتەکاندا. ڕێز لە خەونی گەورەی دەستەی دامەزرێنەری ژوورەکە دەگرین کە ئەمڕۆ بووەتە یەکێک لە ئەکتیڤترین ژوورە بازرگانییەکان لەسەر ئاستی هەرێمی کوردستان و عێراق.”
خۆشناو جەختیشی لە پەیوەندییە نێودەوڵەتییەکانی ژوورەکە کردەوە و ئاماژەی بەوە دا کە ئەم دامەزراوەیە توانیوێتی تۆڕێکی بەهێزی پەیوەندی دیپلۆماسی و پیشەیی لەگەڵ ژوورە بازرگانییەکانی عێراق، ناوچەکە و وڵاتانی ئەوروپادا دروست بکات.
لە کۆتایی وتارەکەیدا، پارێزگاری هەولێر تیشکی خستە سەر دیدگای حکومەت بۆ کەرتی تایبەت و رایگەیاند: “حکومەتی هەرێمی کوردستان لەسەر ڕاسپاردەی مەسرور بارزانی، سەرۆکی حکومەت، کەرتی تایبەت بە هاوبەشێکی سەرەکی دەزانێت و هەمیشە کارئاسانی بۆ بازرگانان کردووە تا لە داڕشتنی ستراتیژیی ئابووریدا ڕۆڵی کاریگەر بگێڕن.”