فەرمانبەرێکی بەڕێوەبەرایەتیی کارەبای ڕاپەڕین، لە کاتی جێبەجێکردنی ئەرکەکەیدا بەهۆی بەرکەوتنی تەزووی کارەباوە گیانی لەدەست دا و وەزیری کارەباش پەیامێکی سەرەخۆشی بڵاوکردەوە.
کەمال محەمەد ساڵح، وەزیری کارەبای حکوومەتی هەرێمی کوردستان لە ڕاگەیەندراوێکدا گیانلەدەستدانی فەرمانبەرێکی وەزارەتەکەی بەناوی (جومعە ڕەفیق مەحموود) ڕاگەیاند، کە کارمەندی کارەبای ڕاپەڕین بووە و لە کاتی ڕاپەڕاندنی ئەرکی فەرمیی خۆیدا، بەهۆی لێدانی تەزووی کارەباوە گیانی سپاردووە.
لە بەشێکی پەیامەکەیدا، وەزیری کارەبا بە ناوی خۆی و وەزارەتەکەیەوە پرسە و سەرەخۆشی ئاراستەی بنەماڵە، کەسوکار و هاوکارانی کۆچکردوو کردووە و هاوبەشیی خەمی خۆی بۆ ئەم ڕووداوە دڵتەزێنە دەربڕیوە، هاوکات داوای لە خوای گەورە کردووە کۆچکردوو بە بەهەشتی بەرین شاد بکات و سەبووری بە ماڵباتەکەی ببەخشێت.
