سعود ئەلساعدی، سەرۆکی فراکسیۆنی حقوق لە ئەنجومەنی نوێنەران، ئاشکرای کرد کە سکاڵایەکی فەرمیی ڕادەستی دادگای باڵای فیدراڵی کردووە دژی بڕیارەکەی حکومەت بۆ گۆڕینی نرخی ئاڵوگۆڕی دۆلاری ئەمریکی.
ئەلساعدی لە لێدوانێکدا بۆ ئاژانسی “شەفەق نیوز” ڕایگەیاند کە ئەمڕۆ بە شێوەیەکی فەرمی سکاڵای لە دژی بڕیاری ژمارە (544)ی ئەنجومەنی وەزیرانی عێراق تۆمار کردووە، کە تایبەتە بە بەرزکردنەوەی نرخی ئاڵوگۆڕی دۆلاری ئەمریکی بەرامبەر بە دیناری عێراقی.
ئاماژەی بەوەش کرد کە دادگای فیدراڵی سکاڵاکەی وەرگرتووە و ڕایگەیاندووە لە ڕۆژانی داهاتوودا وادەیەکی فەرمی بۆ دانیشتنی داواکە دیاری دەکات.
ئەم هەنگاوەی پەرلەمانتاران دوای ئەوە دێت کە ئەنجومەنی وەزیرانی عێراق ڕۆژی سێشەممەی ڕابردوو، بەپێی ڕێنماییەکی بەپەلەی وەزیری دارایی و پارێزگاری بانکی ناوەندی، بڕیاری دا بە دەستکاریکردنی نرخی ئاڵوگۆڕی دۆلار؛ بەجۆرێک نرخی کڕین لە وەزارەتی دارایی بۆ (1500) دینار، نرخی فرۆشتن بە بانکەکان بۆ (1510) دینار و نرخی فرۆشتن بە سوودمەندبووی کۆتایی بۆ (1520) دینار بەرامبەر بە یەک دۆلار دیاری کرا.
بەپێی ئەم دەستکاریکردنە نوێیە، بانکی ناوەندی نرخی ئاڵوگۆڕی بۆ هاووڵاتییان بە بڕی 20 هەزار دینار بۆ هەر 100 دۆلارێک بەرزکردەوە، بە بەراورد لەگەڵ نرخی پێشوو کە (1320) دینار بوو بۆ هەر دۆلارێک؛ ئەمەش لە کاتێکدا بوو کە بازاڕی ئازاد پێش ئاشکراکردنی بڕیارەکە بازدانی بەخۆیەوە بینی و گەیشتە نزیکەی 165 هەزار دینار بۆ هەر 100 دۆلارێک.