حکومەتی هەرێمی کوردستان بە توندترین شێوە ئەو هێرشە تیرۆریستییە سەرکۆنە دەکات، کە کڵێسایەکی لە پارێزگای (کەرەک) لە شانشینی ئوردنی هاشمیی دۆست کردە ئامانج، کە لە ئەنجامدا، ژمارەیەک هاووڵاتیی مەدەنی بوونە قوربانی و بریندار بوون. هاوکات، حکومەتی هەرێم نیگەرانی و داخ و پەژارەی قووڵی بەرانبەر بەم کردەوە تاوانکارییە دەردەبڕێت، کە پێشێلکارییەکی ئاشکرای بەها مرۆییەکان و ئەو بنەمایانەیە کە ئازادیی خواپەرستی و پاراستنی شوێنە ئایینییەکان و گیانی هاووڵاتییانی سڤیل دەستەبەر دەکەن.
لە کاتێکدا حکومەتی هەرێمی کوردستان ڕەتکردنەوەی بنبڕی خۆی بۆ هەموو جۆرەکانی تیرۆر و توندوتیژی و توندڕەوی دووپات دەکاتەوە، هەروەها جەخت لەوەش دەکاتەوە کە بەئامانجگرتنی پەرستگاکان و هەوڵەکانی چاندنی تۆوی دووبەرەکی و نانەوەی ئاژاوە لەنێوان پێکهاتەکانی کۆمەڵگەدا، هەڕەشەیەکی مەترسیدارن بۆ سەر ئاشتیی کۆمەڵایەتی و پێکەوەژیانی ئایینی و هیچ ئەنجامێکیان نابێت، جگە لە تێکدانی ئاسایش و سەقامگیری.
حکومەتی هەرێمی کوردستان هاوسۆزی و پشتیوانیی تەواوی خۆی بۆ شانشینی ئوردنی هاشمی، بە سەرکردایەتی و حکومەت و گەلەکەیەوە ڕادەگەیەنێت و پرسە و سەرەخۆشی و هاوخەمیی قووڵی خۆی ئاڕاستەی بنەماڵە و کەسوکاری قوربانییان دەکات و هیوای زوو چاکبوونەوەش بۆ برینداران دەخوازێت.
هەروەها جەخت لە گرنگیی پتەوکردنی هاریکاری و هەماهەنگیی هەرێمی و نێودەوڵەتی دەکاتەوە، بۆ بەرەنگاربوونەوەی تیرۆر بە هەموو شێوەکانییەوە و پاراستنی ئاسایش و سەقامگیریی کۆمەڵگەکان.
حکومەتی هەرێمی کوردستان
٢٣ی تشرینی یەکەمی ٢٠٢٦