لە کاردانەوەیەکدا بەرانبەر بە ڕاگەیاندراوی ڕۆژی رابردووی بریتانیا، ئاڵمانیا و فەڕەنسا سەبارەت بە بەرنامەی ئەتۆمیی ئێران، سێ وڵاتی رووسیا و چین و ئیران لە راگەیاندراوێکدا ڕەخنەیان لەم سێ وڵاتە ئەورووپاییە و ئەمریکا گرت و پشتیوانیی خۆیان بۆ ڕێککەوتننامەی ئەتۆمی لە نێوان ئێران و وڵاتانی پێنج کۆ یەک دووپات کردەوە.
لەم راگەیاندراوەدا هاتووە: ئەمریکا لە ساڵی 2018دا یەکلایەنە لە ڕێککەوتننامەی ئەتۆمی کشایەوە و سیاسەتی گوشار بۆ سەر ئێرانی گرتە بەر، بەڵام سیاسەتی ئەم وڵاتانە بەرانبەر بە ڕێککەوتننامەی ئەتۆمی نەگۆڕاوە.
ئەم سێ وڵاتە بە ئاماژەکردن بە 9 خولی دانوستانەکانی زیندووکردنەوەی ڕێککەوتننامەی ئەتۆمی، سێ وڵاتی ئەورووپی و ئەمریکایان بە پێشێلکردنی بەڵێنەکانیان تۆمەتبار کردووە و جەختیان کردووەتەوە ئەم وڵاتانە بە هۆی بەرژوەندیی سیاسییەوە ئامانجی زیندوکردنەوەی ڕێککەوتننامەکەیان پشتگوێ خستووە.