بەڕێوەبەرایەتیی پۆلیسی سلێمانی ڕایگەیاند، كە جاودووگه‌رێكیان دەستگیر كردووە و لە كاتی ده‌ستگیركردنیشیدا دەست گیرا بەسەر ژمارەیەك كتێب و چەند كەلوپەلێكی دیكەدا كە بۆ سیحر و جادووكردن بەكاری هێناوە.
ئەمڕۆ سێشەممە 23ی 7ی 2024، بەڕێوەبەرایەتیی پۆلیسی سلێمانی، لە پەیجی تایبەتیی خۆی لە تۆڕی كۆمەڵایەتیی (فەیسبووك) ڕایگەیاندووە: “لە لایەن مەفرەزەكانی بنكەی پۆلیسی عەربەتەوە تۆمەتبارێك دەستگیر كرا كە كاری سیحر و جادووی دەكرد.”
لە ڕاگەیاندراوەكە دا، ئەوەش هاتووە، “دوای ئەوەی زانیاری گەیشتە دەست هێزەكانی پۆلیس، كەوا كەسێك كاری سیحر و جادوو دەكات، هێزەكانی پۆلیس لێكۆڵینەوە و بەدواداچوونەكانیان دەست پێكرد و دوای وەرگرتنی بڕیاری دادوەر لەلایەن بنكەی پۆلیسی عەربەتەوە تواندرا تۆمەتبار بدۆزرێتەوە و دەستگیر بكرێت.”
پۆلیسی سلێمانی ئه‌وه‌شی خستووه‌ته ڕوو، ئێستا تۆمەتباره‌كه بە ناوی (ت، ئ، ح) لەدایكبووی 1982، دانیشتوی كەمپی باریكە، بە بڕیاری دادوەر و بەپێی مادەی 240 لە یاسای سزادانی عیراقی ڕاگیراوە و لە كاتی دەستگیركردنیشیدا، دەست گیرا بەسەر ژمارەیەك كتێب و چەند كەلوپەلێكی دیكەدا، كە بۆ سیحر و جادووكردن بەكاری هێناوە.