شاره‌زایه‌كی كه‌شناسی ڕایده‌گه‌یه‌نێت، ئەمڕۆ سێشه‌ممه گەرمترین ڕۆژی ئەم مانگە دەبێت و لە سبەیەوە پلەی گەرما نزم دەبێتەوە.
ئاراس جه‌بار، شاره‌زای كه‌شناسی ڕایگه‌یاند، بە گشتی ئەمڕۆ سێشه‌ممه 10ی 9ی 2024، گەرمترین رۆژی مانگی ئەیلوولی ئەمساڵ دەبێت، لە سەرتاسەری ناوچەکانی عێراق و ھەرێمی کوردستان و لە سبەی چوارشەممەوە، لە ئەنجامی نزیکبوونەوەی ھەوایەکی فێنک لە دەریای ناوەڕاستەوە بۆ سەر ناوچەکانمان پلەی گەرما بە جیاوازی ناوچەکان 2 تا 3 پلە نزم دەبێتەوە و رۆژانی داھاتووش بۆ سەرەتای ھەفتەی ئایندە کاریگەری ئەو بارستە ھەوایە زیاتر دەبێت و پلەی گەرمی بەردەوام دەبێت لە نزمبوونەوە و ناوچەکە وردە وردە دەچێتە نێو کەشێکی پایزه‌وه.
ڕاشیگه‌یاند، له سبه‌ی چوارشه‌ممه‌وه، بۆ کۆتایی ئەم ھەفتە پێشبینی دەکرێت شەپۆلێکی زۆر سارد و باراناوی لە جەمسەری باکوورەوە بۆ سەر زۆرێکی وڵاتانی ئەوروپا شۆرببێتەوە و لە چیا بەرزەکانیشدا لە ئەنجامی نزمبوونەوەی بەرچاوی پلەی گەرما پێشبینی دەکرێت بەفر ببارێت و ئەم شەپۆلە ھەفتەی داھاتوو دەگاتە سەر دەریای ناوەڕاست و وڵاتانی باشوور و باشووری رۆژھەڵاتی ئەوروپا و لە ناوەڕاستی ھەفتەی داھاتوو لە 16/9/2024 کاریگەریەکانی بەشێوەی ھەوای فێنک و نزمبوونەوەی پلەکانی گەرما بۆ وڵاتانی شام و عێراق و ھەرێمی کوردستان درێژ دەبێتەوە لەگەڵ ئەگەری گۆرانکاریش لە پێشھاتەکەدا.