محەممەد کازم ئال سادق، باڵیۆزی ئێران لە عێراق ڕایگەیاند، سەرۆککۆماری ئیسلامی ئێران لە سەردانی دوو ڕۆژەی داهاتووی بۆ عێراق سەردانی بەغدا و بەسرە و ناوچەی کوردستانی عێراق دەکات.
ئال سادق سەبارەت بە سەردانەکەی سبەی چوارشەممەی مەسعود پزیشکیان بۆ عێراق ، بە ئاژانسی ئیسنای گوت: ئەم سەردانە لە وەڵامی بانگهێشتی سەرۆکوەزیرانی عێراق، محەمەد شیعاع سوودانییە، بە ئامانجی فراوانکردن و بەهێزکردنی پەیوەندییە سیاسی، کولتووری، ئابووری و ئەمنیەکان.
ئاماژەی بەوەش کرد، لەم سەردانەدا لەسەر پرسە دووقۆڵییەکان و هاوکارییە نێودەوڵەتی و ناوچەییەکان و دوایین پێشهاتەکانی ڕۆژئاوای ئاسیا ئەنجام گفتگۆدەکرێت.
باڵیۆزی ئێران لە عێراق ڕوونی کردەوە و گوتی: لەم سەردانەدا سەرۆککۆماری ئێران لەگەڵ سەرۆکی ئەنجوومەنی باڵای دادوەری عێراق فائق زێدان کۆدەبێتەوە، دواتر بەشداری لە خوانێکی ئێوارەدا دەکات.
ئال سادق دەشڵێت: لەم سەردانەدا یاداشتێکی لێکتێگەیشتن لە نێوان بەرپرسانی هەردوو وڵات لە بوارەکانی سیاسی، ئابووری، بازرگانی، ئەمنی، پۆستە، پەیوەندییەکان، کشتوکاڵی، هونەری و وەرزشی واژۆ دەکرێت.
سەبارەت بەوەی ئایا سەرۆککۆماری ئێران لە سەردانەکەیدا بۆ هەرێمی کوردستان دەچێتە هەولێر یان نا، باڵیۆزی ئێران گوتی: سەردانی سەرۆکی کۆمار بۆ ئەم ناوچەیە پلانی بۆ دانراوە.
ئاشکراشی کرد، پێدەچێت سەردانەکەی سەرۆک کۆماری ئێران بۆ عێراق دوو ڕۆژ بخایەنێت، لەو ماوەیەدا سەردانی مەزارگە پیرۆزەکانیش دەکات.